Covid-19: Habonetse Abantu 1997 bashya banduye Covid-19 naho 12 bahitanwa nayo
Uko iminsi ishira niko icyorezo kigenda gifata intera aho cyanatangiye kugenda kihinduranya dore ko habonetse ubwoko bushya bwacyo, magingo aya abatuye Isi, Delta Covid-19 ibaraje ishinga dore ko iri kubibasira. Covid-19 imaze iminsi 491 igeze mu Rwanda ikaba imaze guhitana 638 naho abayirwaye bagera kuri 54,549 gusa muri bo 70% barayikize.
Covid-19 ni icyorezo kimaze iminsi igera kuri 491 mu Rwanda bivuze ko kimaze umwaka umwe n’amezi ane n’iminsi igera kuri 5. Kuva iki cyorezo cyagera mu Rw’imisozi igihumbi kuwa 13 Werurwe 2020, ntabwo kigeze giha amahwemo abarutuye kuko hagiye haba ubwiyongere bukabije ndetse ari nabyo bikomeje gutera impungenge Leta bigatuma ishyiraho ingamba zikarishye zirimo gahunda ya Guma mu Rugo iri gushyira ubukungu bwa benshi n’imibereho mu kaga.
Kuri uyu munsi mu Rwanda abagera ku bihumbi 15,725 baracyarwaye Covid-19 naho 638 yabambuye ubuzima aho abagera ku 38,186 bayikize, ni ukuvuga 70% by’abanduye iki cyorezo bose barakize naho abagera kuri 28.8% baracyarwaye naho abahitanwe nacyo ni 1.169%.
Kuri uyu wa 17 Nyakanga, Minisiteri y’Ubuzima yatangaje ko hafashwe ibipimo bya Covid-19 bigera kuri 50,880 aho habonetsemo abarwayi 1,997 mu gihe abapfuye ari abantu 12 barimo abagore batandatu bahitanywe n’iki cyorezo.
Nk’uko itangazo ryatanzwe na Minisiteri y’ubuzima ribivuga, kuri uyu wa 17 Nyakanga 2021 hakozwe ibipimo byinshi cyane dore ko kuri uyu munsi igikorwa cyo gupima abaturage cyakozwe ku rwego rwa Kagali aho nibura 15% by’abagiye batuye mu kagali bagiye bapimwe!
Kuri uyu wa Gatandatu tariki 17 Nyakanga 2021, Uturere 4 muri 30 tugize igihugu aritwo Nyanza, Karongi, Rwamagana na Rutsiro nitwo tutigeze tubonekamo ubwandu mu gihe nk’Umujyi wa Kigali wonyine habonetsemo abantu 1,391 banduye.
Minisante yihanganishije imiryango yabuze ababo, aho ibinyujije ku rubuga rwayo rwa Twitter yagize iti " Twihanganishije imiryango y’abagore batandatu b’imyaka 81 (Bugesera), 66, 35, 28 (Kigali), 63 (Karongi) na 57 (Rulindo) n’abagabo batandatu b’imyaka 83 (Rutsiro), 81 (Karongi) 76, 72, 72 (Kigali) & 65 (Karongi) bitabye Imana".