Rwanda: Habonetse ubwoko bwa Covid-19 butazwi

Mu bipimo 242 byo gushaka amoko ya Covid19 ari mu Rwanda habonetsemo ubwoko butazwi bw'iyi virus buri ku kigero cya 5.4%, nk'uko Imibare iva muri Minisiteri y'Ubuzima ibyerekana.

 

Ubwoko bwiganje cyane ni Delta, bwabonetse bwa mbere mu Buhinde, iri ku gipimo cya 56.6%, nk'uko Minisitiri Dr Daniel Ngamije yabivuze mu kiganiro kuri televiziyo y'u Rwanda.

Dr Ngamije yasobanuraga impamvu zatumye leta yongeraho iminsi itanu ku mategeko ya 'Guma mu rugo' agamije kugabanya ukwiyongera kw'iki cyorezo, yatangiye ku tariki ya 17 y'uku kwezi kwa karindwi.

Yavuze ko ubwoko bwa Delta, "bwandura vuba kandi butera abantu kuzahara no gupfa ari benshi" ari bwo busobanura "ukuntu iki cyorezo cyadutunguye mu kwezi kwa gatandatu tukabona mu gihe gitoya kirazamutse".

Imibare y'abashya bandura n'abicwa na Covid yakomeje kuzamuka mu Rwanda kuva icyo gihe, bituma ingamba zikazwa muri uku kwezi mu mujyi wa Kigali no mu turere umunani.

Ubwoko bwa Delta bumaze kuboneka mu bihugu 124 ku isi, nk'uko OMS/WHO ibivuga.

Ku ngingo yo kwihinduranya kwa Covid19, ubwoko butazwi bwabonetse mu Rwanda bushobora kuba ari urundi rugero rw'uburyo iyi virus ikomeje kwihinduranyamo ayandi moko, ibiri kuboneka ahanyuranye ku isi.

WHO ivuga ko mu bihugu bitandukanye kugeza ubu hakomeje kuboneka amoko atazwi avuye ku kwihinduranya kw'iyi virus.

Ubushakashatsi ni bwo bwakwemeza niba ubwoko bwabonetse mu Rwanda ibimenyetso byabwo hari ahandi byabonetse, cyangwa niba buteye impungenge isi.