Umugabo yasanze ibuye rigura Frw miliyari 100 na miliyoni 732 mu isambu ye

Urwego rushinzwe iby'umutungo kamere muri Sri Lanka ruvuga ko umugabo utavuzwe amazina, ubwo yacukuraga iriba mu isambu ye, yageze ku ibuye ryitwa Sapphire rifite agaciro ka $ miliyoni 100 (Frw miliyari 100 na miliyoni 732).

Gamage usanzwe acuruza imitako avuga ko yahamagawe n'umuturage wo mu gace ka Ratnapura, akamubwira ko abonye ibuye atazi. Abahanga bemeza ko iri buye rifite agaciro kavuzwe haruguru ku isoko mpuzamahanga.

Iri buye ripima Kg 510 bakaba baryise “Serendipity Sapphire”. Gamage yanze kubwira BBC Swahili, amazina yose ya nyir'iryo buye ku bw'umutekano we.

Umuyobozi w'Urwego rushinzwe iby'umutungo kamere muri Sri Lanka, Thilak Weerasinghe, yavuze ngo " Ni ibuye ry'agaciro. Ntekereza ko ari ryo rinini ku Isi. Ku bunini n'agaciro, twizeye ko abagura amabuye bazarikunda cyangwa abafite inzu ndangamurage."

Iri buye ryari rimaze umwaka wose ryitabwaho n'ababishinzwe, barikuraho ibyondo ari nako bashakashaka ngo bamenye ibyaryo neza.

Umuhanga mu by'ubucukuzi, Dr Gamini Zoysa, avuga ko " Sinigeze mbona ibuye rinini ry'agaciro nk'iri. Rishobora kuba ryarabayeho mu myaka miliyoni 400 ishize."

Abahanga bavuga ko n'ubwo bimeze bityo, bitashoboka ko amabuye ari imbere muri iri buye, yaba afite agaciro ko hejuru.

Ratnapura, ubusanzwe bisobanuye ngo umujyi w'amabuye y'agaciro. Hakomeza kuboneka amabuye menshi ahenze.