Inkingo za Covid-19 Norvège yanze gukoresha kubera ingaruka zazo, yazihaye Uganda

Guverinoma ya Norvège yahaye iya Uganda doze 286,080 z’inkingo za Astrazeneca yavuze ko itazongera gukoresha guhera muri Gicurasi 2021 bitewe n’ingaruka zagiraga ku baturage zirimo kuvura kw’amaraso.

Izi nkingo zakiriwe na Minisitiri w’Ubuzima wa Uganda, Dr Jane Ruth Aceng mu gitondo cy’uyu wa 31 Nyakanga 2021, hamwe n’izindi doze 300,000 z’urukingo Sinovac zaturutse mu Bushinwa.

Minisitiri Aceng yatangaje ko Uganda ibonye izi nkingo mu gihe yari izikeneye kuko yari yarabuze uko iha doze ya kabiri abahawe iya mbere, aboneraho gushimira ibi bihugu byombi.

Yagize ati: “Ndashimira Guverinoma ya Norvège na Repubulika y’u Bushinwa zazibye icyuho mu gukingira muri Uganda.”

Guverinoma ya Norvège yahagaritse gukoresha izi nkingo ibisabwe n’ikigo cy’igihugu gishinzwe ubuzima bw’abaturage, NIPH hamwe n’itsinda ry’inzobere mu by’ubuzima yari yarashyizeho kugira ngo rigenzure ubuziranenge bwazo.

Icyo gihe, Minisitiri w’Intebe w’iki gihugu yabwiye itangazamakuru ko bateganya kuziha ibindi bihugu bizikeneye, bo bagakoresha gusa iza Johnson & Johnson.

Izi doze Norvège yahaye Uganda birasaba ko zikoreshwa byihuse kuko zizasaza muri Nzeri 2021.