Rwamagana: Umupolisi yarashe umusore wari warenze ku mabwiriza yo kwirinda covid-19 arapfa

Umupolisi witwa Siboniyo Jean d'Amour ukorera mu Karere ka Rwamagana yishe arashe umusore witwa Iradukunda Elissa uzwi nka Ndimbati warenze ku mabwiriza yo kwirinda Covid-19, bivugwa ko yagerageje kumurwanya no kumwambura imbunda.

. Umupolisi yishe umusore wari warenze ku mabwiriza yo kwirinda Covid-19

. CLADHO yamaganye urupfu rw'umusore wiciwe i Rwamagana arashwe n'umupolisi

Byabereye mu Mudugudu wa Kiyovu, Akagari k'Akanzu mu Murenge wa Nzige mu masaa moya y'umugoroba wo ku wa Mbere, tariki ya 9 Kanama 2021.

Umuyobozi wa Polisi muri aka Karere, SSP Magwigwi Oscar yabwiye The Future TV ko icyo gihe abasore batanu batashye igihe cyo kugera mu rugo cyarenze bahagaritswe n’urubyiruko rw’abakorerabushake barabyanga, bahura n’abapolisi bari kugenzura iyubahirizwa ry’aya mabwiriza; bariruka, hafatwa Iradukunda.

Iradukunda ubwo yafatwaga, ngo yari afite amahane ku buryo yashakaga kurwanya aba bapolisi , agerageze kubiyaka kugira ngo abacike. Ati: “Binaniranye ashikuza imbunda umupolisi wari uyambaye mu gatuza, arayikurura iracika.”

Mugenzi w’uyu mupolisi ngo yahise arasa hejuru kugira ngo akange Iradukunda, ariko umusore akomeza kurwana. SSP Magwigwi ati: “Ni bwo undi yamurashe, arapfa.”

N'ubwo Polisi isobanura ko Iradukunda yishwe arashwe ari kurwanya umupolisi, ntibyabujije umuryango CLADHO uharanira uburenganzira bw'ikiremwamuntu kwamagana iki gikorwa n'ibindi bisa nabyo byagiye bigaragara ku bakorera uru rwego rushinzwe umutekano.

Mu butumwa uyu muryango wanyujije kuri Twitter muri iki gitondo, wagize uti: "CLADHO iributsa abantu bose ko umuntu afite uburenganzira bwo kubaho nk'uko bigaragara mu Itegekonshinga rya Repubulika y'u Rwanda ryo muri 2003 nk'uko ryavuguruwe muri 2015 no mu itangazo mpuzamahanga ry'uburenganzira bwa muntu n'itegeko ryo ku wa 25/07/2007 rikuraho igihano cy'urupfu."

Uyu muryango wakomeje usaba polisi kwirinda kuvutsa umuturage ubuzima, uti: "Tukaba dusaba Polisi n'izindi nzego z'umutekano kwirinda kuvutsa umuntu ubuzima igihe bacunga umutekano bareba abatubahiriza amabwiriza yo kwirinda Covid-19 kuko hari ubundi buryo bwakoreshwa atarashwe nk'uko byagendekeye uriya musore w'i Rwamagana warashwe n'abakabaye bamurengera."

CLADHO irasaba ko abagize uruhare ku rupfu rwa Iradukunda bagezwa imbere y'ubutabera, kandi ibikorwa byo kurasa abantu bigahagarara.

Ibwiriza rya Guverinoma y'u Rwanda ryo ku wa 30 Nyakanga 2021 rivuga ko abaturarwanda bagomba kuba bageze mu rugo bitarenze saa kumi n'ebyiri z'umugoroba.