Min. W'ingabo muri Afurika y'Epfo avuga ko ingabo z'u Rwanda ntacyo zakoze muri Mozambique

Minisitiri w'Ingabo n'ibikorwa by'abahoze ari abasirikare muri Afurika y'Epfo, Thandi Modise, avuga ko Ingabo z' u Rwanda ziri muri Mozambique nta kazi zakoze kugeza ubu ngo ahubwo nibwo urugamba rugiye gutangira.

 

. Min. w'ingabo muri Afurika y'Epfo yavuze ko urugamba ari bwo rugitangira

. Ingabo z'u Rwanda n'iza Mozambique zafashe ahantu hatari abarwanyi - Min. Thandi Modise

 

Ikinyamakuru gitungwa agatoki ko gikorera mu kwaha kwa Leta ya Uganda, nayo itabanye neza n' u Rwanda, Chimpreports, nicyo cyatangaje ko Minisitiri Modise yavugiye aya magambo kuri imwe muri radiyo zo muri Afurika y'Epfo kitavuze amazina.

Uyu mugore uri mu ndwanyi zahanganye na Apartheid ngo yagize ati " Urugamba nibwo rwatangira, ibi ntibyafatwa nk'intsinzi ya nyuma."

Thandi Modise we nk'uko Chimpreports ibitangaza, yavuze ko kuvuga ko RDF yatsinze inyeshyamba ari " Poropaganda y' u Rwanda." Ati " Ubwo inyeshyamba zabonaga ko ingabo z'amahanga zije, zatangiye guhunga. Aho bafashe hari ahantu hatari abarwanyi."

Yakomeje agira ati " Abanyarwanda baragenda bagafata ahantu gusa. Ni poropaganda iri gukora, reka twiturize."

Afurika y'Epfo ku ikubitiro yagaragje ko itashimishijwe n'uko RDF yageze muri Mozambique mbere y'izindi ngabo. Yari yagaragaje ko byanyura muri SADC nyamara u Rwanda rufitanye amasezerano y'imikoranire mu bya gisirikare na Mozambique.

Ku Cyumweru, RDF yavuze ko ifatanyije na FADM babashije kwigarurira Umujyi wa Mocimboa da Praia muri Mozambique, ahantu hari ingenzi ku nyeshyamba.

Ibi byagarutsweho cyane hirya no hino ku Isi, bashima RDF na FADM kuri iki gikorwa cy'indashyikirwa.

Afurika y'Epfo mu minsi mike nibwo yohereje abasirikare bayo muri Mozambique mu gihe RDF ihamaze igihe kandi ikaba ikunze kuvuga ko ihanganye n'inyeshyamba kuva yagera muri Mozambique yigarurira uduce twari mu maboko y'inyeshyamba nka Awasse.