Abataribani binjiye Kabul umurwa mukuru wa Afganistani

Minisiteri y’Umutekano w’Imbere muri Afghanistan imaze gutangaza ko abarwanyi b’Abatalibani batangiye kwinjira mu murwa mukuru, Kabul, baturutse impande zose.

Ni nyuma yo gufata indi mijyi yose y’iki gihugu mu gihe gitoya, urugamba rweruye rwatangiye ubwo Leta Zunze Ubumwe za Amerika (USA) zari zishyigikiye ubutegetsi bwa Afghanistan zakuragayo abasirikare bazo.

RFI dukesha iyi nkuru ivuga ko ubwo Abatalibani binjiraga muri Kabul, bitigeze bibagora kuko ingabo za Leta zitigeze zibarwanya cyane.

Mu gihe binjira muri uyu murwa, ubuyobozi bw’Abatalibani bwasabye aba barwanyi kutagira uwo bahohotera, basabwa kwemerera buri wese ushaka kuwuvamo, akagenda nta we umuhungabanyije.

USA yatangiye gukura abayihagarariye muri uyu mujyi, u Bwongereza nabwo bugiye kohereza abasirikare 600 barafasha ababuhagarariyeho n’abenegihugu babwo kuva muri Kabul.

Kuri uyu wa 14 Kanama 2021, Abatalibani ni bwo bafashe umujyi wa Jalalabad na Mazar-e-Sharif bitabagoye. Ubwo bari mu bilometero 50 basatira Kabul, Perezida wa Afghanistan, Ashraf Ghani yasabye ingabo za Leta gukomeza kurwana, avuga ko atava ku butegetsi.

Urugamba rw’Abatalibani rugamije guhirika ubutegetsi bwa Perezida Ashraf Ghani. Baherutse gutangaza ko batazaruhagarika mu gihe ataribwiriza ngo yegure.