Hakozwe Drones z'ubwiyahuzi zifatwa nk'intwaro ikomeye kandi iteye ubwoba muri iki gihe. Aho zikorerwa - imikorere yazo...

Indege zitagira abadereva (Drones) zirimo guhindura Isi vuba, ariko indege zitagira abadereva za gisirikare zo zirakataje mu ikoranabuhanga aho kuri ubu hakozwe n’iz’ubwiyahuzi bari kwita Kamikaze Drones, zikaba ari zimwe mu ntwaro zigezweho ziteye ubwoba zije guhindura byinshi mu ntambara.

Izi drones zitandukanye n’izindi zisanzwe ahubwo yo wayigereranya na missile kuko itwara igisasu ikishwanyaguza iyo imaze kugera ku gipimo cyayo ari naho bahereye bazita ‘Drones z’ubwiyahuzi’.

Izi drones zoherezwa nka missiles zirashwe

Izi drones zizwi kandi nka nk'amasasu arekereje’, zizenguruka hafi y’igipimo cyazo zikabanza kugishakisha zamara kukibona neza zigahita zikigabaho igitero zikagishwanyukiraho.

Ni drones zoherezwa zirashwe nk’uko barasa ibisasu bya missiles nk’ibindi byose, ariko iyo isohotse mu mbunda iyirashe ihita ifungura amababa yayo na yo igatangira kwigurutsa ishakisha igipimo ikoresheje camera yubatseho yamara kukibona ikagisatira.

Isohoka mu mbunda nk'igisasu igahita ifungura amababa yayo

Imikorere y’ubu bwoko bw’intwaro ni myiza ku bipimo biba bihishe bigoye kubona mu gihe gito, kandi hakenewe kugira igikorwa byihuse. Izi drones ariko ukuntu zihuta mu gushaka no kubona igipimo bituma ziba intwaro z’akataraboneka muri iki gihe.

Izi drones z’ubwiyahuzi zakozwe bwa mbere n’ikigo IAI (Israel Aerospace Industries)cyo muri Israel, ariko ubu zinakorwa n’ibihugu birimo Leta Zunze Ubumwe za Amerika, Korea y’Epfo n’u Bushinwa nk'uko tubikesha Defensenews.

Izi drones kandi kugeza ubu zikoreshwa n’ibihugu bigera muri 14. Ziheruka kwigaragaza mu ntambara zikoreshwa n’igihugu cya Azerbaijan mu ntambara ya Nagorno-Karabakh gihanganye n’igihugu cya Armenia.