Umutoza Ronald Koeman wa FC Barcelona mu mazi abira

Amakuru aturuka mu bitangazamakuru bitandukanye byandika imikino muri Espagne, aravuga ko ikipe ya FC Barcelona yafashe icyemezo cyo kudakomezanya n'umutoza Ronald Koeman kubera umusaruro mubi.

Mu mwaka ushize ni bwo uyu mugabo ukomoka mu gihugu cy'u Buholandi yageze muri FC Barcelona, asimbuye Quique Sétien wari umaze kwirukanwa.

Koeman mu mwaka we wa mbere igikomeye yafashije Barça ni ukuyifasha kurangiza ku mwanya wa gatatu muri shampiyona ndetse no kuyigeza muri 1/8 cy'irangiza cya UEFA Champions league yasezerewemo na PSG ku bitego 5-2.

Ronald Koeman kandi yafashije FC Barcelona kwegukana Copa del Rey ari na cyo gikombe rukumbi yatwaye mu mwaka ushize w'imikino.

Muri uyu mwaka nta mukino Barcelona yari yatsindwa muri shampiyona ya Espagne, gusa kunyagirwa na Bayern Munich ibitego 3-0 mu mukino wa Champions league wabaye mu cyumweru gishize byatumye umutoza Ronald Koeman atangira gushidikanywaho.

Ibyago byo kwirukanwa kuri uyu mutoza byiyongereye mu ijoro ryakeye ubwo FC Barcelona yagwaga miswi na Granada igitego 1-1, mu mukino w'umunsi wa kane wa shampiyona ya Espagne wabereye i Camp Nou.

Byasabye umunota wa 90 w'umukino ngo umunya-Uruguay Ronald Araujo yishyurire Barça igitego yari yatsinzwe ku munota wa kabiri w'umukino.

Bimwe mu byo umutoza Ronald Koeman akomeje kunengwa harimo imikinishirize n'amayeri y'umukino (Tactique) bidatanga umusaruro, ndetse no kuba adashobora kwikangarira mu gihe FC Barcelona yatsinzwe igitego.

Hiyongeraho kandi kuba hari abakinnyi ajya aheza [nka Riqui Puig] nyamara bashoboye.

Mu batoza bivugwa ko bashobora gusimbura uyu mugabo harimo Roberto Martineza usanzwe atoza ikipe y'Igihugu y'u Bubiligi, Erik Ten Haag utoza Ajax yo mu Buholandi cyo kimwe na Xavi Hérnandez wa Al Saad yo muri Qatar.