Nta munyeshuri wo muri Kaminuza uzemererwa kwiga atarikingije Covid-19 - MINISANTE & HEC

Ku wa 23 Nzeri 2021, Minisiteri y’Ubuzima ifatanyije n’Inama y’Igihugu y’Amashuri Makuru na Kaminuza (HEC), bagiranye inama n’ubuyobozi bwa Kaminuza zitandukanye, yanzura ko “Umunyeshuri cyangwa umukozi muri Kaminuza utarakingiwe urukingo na rumwe rwa Covid-19, atemerewe kwinjira muri Kaminuza guhera kuri uyu wa Mbere tariki 27 Nzeri 2021.”

Ku wa Gatanu tariki 24 Nzeri 2021, mu butumwa bwakwirakwijwe kuri ‘WhatsApp’, Kaminuza yigenga ya Kigali (ULK), yamenyesheje abanyeshuri bayigamo n’abakozi bayo ko “Ntawe uzemererwa kwinjira atarikingije Covid-19.”

Mu mpera z’iki cyumweru, Kaminuza y’u Rwanda (UR) na Mount Kenya University ishami rya Kigali (MKUR), basohoye itangazo risaba abanyeshuri n’abakozi kwingiza Covid-19, kugira ngo bemererwe kwinjira.

Itangazo rya Kaminuza y’u Rwanda rivuga ko “guhera kuri uyu wa mbere, abanyeshuri n’abakozi bazemererwa kwinjira ari abikingije Covid-19."

Umunyeshuri, asabwa kugaragaza nibura ko yamaze gufata doze ya mbere y’urukingo rwa Covid-19. Itangazo rya Kaminuza ya Mount ya Kenya ryo, rinavuga ko nta serivisi n’imwe umunyeshuri n’umukozi utarikingije Covid1-19 yemerewe muri iyi Kaminuza, guhera kuri uyu wa mbere tariki 27 Nzeri 2021.

Mu Rwanda abantu barenga miliyoni 2 bamaze gukingirwa COVID19,abarenga miliyoni n’igice bakingiwe byuzuye,abarenga 12% by’abaturarwanda bose bamaze kubona urukingo.

Abanyarwanda barenga miliyoni 2 muri miliyoni 7,8 bateganya gukingirwa bamaze guhabwa inkingo zombi.