Cristiano Ronaldo yarokoye Manchester United ku munota wa nyuma ahita anaca akandi gahigo

Ikipe ya Manchester United ibifashijwemo na rutahizamu Cristiano Ronaldo, yaraye itsinze Villarreal bigoranye ibitego 2-1 mu mukino wa UEFA Champions league wabaye mu ijoro ryakeye.

Man United yari yakiriye Villarreal yaherukaga kuyitwara Europa league i Old Trafford, mu mukino wa kabiri wo mu tsinda F rya UEFA Champions league.

Manchester United yihariye umupira mu minota ya mbere gusa abakinnyi bayo barimo Bruno Fernandes na Cristiano Ronaldo bagorwa no kunyeganyeza inshundura.

Villarreal yabahindukanye mu minota mike yakurikiyeho ndetse ibona uburyo bwinshi burimo ubwa Arnaut Danjuma, Paco Alcacer na Yeremi Pino, gusa Manchester United irikorwa kenshi n'umunyezamu David de Gea.

Iyi kipe y'umutoza Unai Emery yafunguye amazamu ku munota wa 53 w'umukino ibifashijwemo na Paco Alcacel, ku mupira yatereye mu rubuga rw'amahina.

Manchester United yishyuye iki gitego nyuma y’iminota irindwi ibifashijwemo n'umunya-Brésil Alex Telles, ku ishoti yatereye inyuma gato y'urubuga rw'amahina ku mupira yari ahawe na Bruno Fernandes.

Iyi kipe yabonye igitego cy'intsinzi ku munota wa 90+4 binyuze kuri Cristiano Ronaldo, ku mupira yari arahawe na Jesse Lingard.

Cristiano uretse guhesha intsinzi Manchester United, yanashyizeho umuhigo wo kuba umukinnyi wakinnye imikino myinshi mu mateka ya UEFA Champions league (178), aciye kuri Iker Casillas wakinnye 177.

Mu yindi mikino yabaye kuri uyu wa Gatatu, FC Barcelone yandagajwe na Benfica iyitsinda ibitego 3-0, mu mukino wo mu itsinda E wabereye i Lisbon.

Ni umukino wa kabiri wikurikiranya iyi kipe yatsindwaga, dore ko yaherukaga gutsindwa nanone na Bayern Munich ibitego 3-0, ndetse kugeza na nubu nta mupira n'umwe ugana mu izamu irabasha gutera muri ririya rushanwa.

UKO WABONA INGEMWE Z'IMYEMBE ZO GUTERA UKORESHEJE AMASHAMI Y'UMWEMBE USANZWE- BIROROSHYE KANDI NTIBITINDA. REBA IYI VIDEO