PSG yigwijeho ibyamamare iracakirana na Real Madrid muri 1/8 cya Champions League. Uko imibare ihagaze

Feb 15,2022

Mu ijoro ryo kuri uyu wa Kabiri, i Parc des Princes ku kibuga cy’ikipe ya Paris Saint Germain harabera umukino w’imbaturamugabo iyi kipe ikina na Real Madrid muri 1/8 cya UEFA Champions League.

Lionel Messi na Sergio Ramos bakundaga guhangana muri Espagne, bombi baraba bagabye igitero kuri Real Madrid bashaka kuyisezerera muri iri rushanwa ndetse bashaka kuyitsinda byinshi kugira ngo bihe umutekano mu mukino wo kwishyura uzabera i Madrid.

PSG yigwijeho amazina akomeye muri ruhago mu mpeshyi ishize, arimo Lionel Messi, Sergio Ramos, Ashraf Hakimi n’abandi, buri wese yatangiye kuyiha amahirwe yo kwegukana ibikombe byose izakinira uyu mwaka gusa bidateye kabiri abantu batangiye kuyishidikanyaho kubera imikinire mibi n’umukino utanogeye ijisho yerekanye mu meza atandatu imaranye n’aba bakinnyi.

Aya makipe agiye guhura mu mukino wo gukuranamo muri iri rushanwa ku nshuro ya kane, PSG yabashije gusezerera Real Madrid inshuro ebyiri, mu 1992/93 na 1993/94, gusa iyi kipe y’i Madrid niyo iheruka gusezerera PSG muri iri rushanwa mu 2017/18.

Muri rusange Paris Saint-Germain na Real Madrid bamaze guhura inshuro 10 muri iri rushanwa haba mu gukuranwamo no mu matsinda. Iyi kipe yo muri Espagne ikaba yaratsinze inshuro nyinshi enye, itsindwa itatu, inganya indi itatu.

Ubwo baheruka guhurira mu itsinda A mu 2019, PSG yatsinze umukino umwe i Paris ibitego 3-0, inganyiriza i Madrid ibitego 2-2.

Real Madrid yatsinze imikino itatu yose yakiniye hanze mu mikino yo mu matsinda ya UEFA Champion League y’uyu mwaka, kandi ntiyinjijwe igitego kuri buri mukino (1-0 na Inter Milan, 5-0 na Shakhtar Donetsk na 3-0 na Sheriff Tiraspol).

Indi nshuro Madrid yari yarabashije gutsinda imikino yose yo hanze 4 muri UEFA Champion League ni muri 2014/15, icyo gihe nabwo batozwaga na Carlo Ancelotti.

PSG yatsinze umukino umwe gusa mu mikino itandatu iheruka gukinira mu rugo mu mikino yo gukuranamo ya UEFA Champion League, harimo gutsindwa inshuro 4 muri iki cyiciro.

Bananiwe gutsinda imikino yabo yose uko ari itatu mu rugo mu mwaka w’imikino ushize, aho banganyije umwe, batsindwa ibiri nubwo bageze muri 1/2.

Kuva umwaka w’imikino wa 2020/21 watangira, Kylian Mbappé ukinira Paris Saint-Germain yagize uruhare mu kurema ibitego mu mikino yakinnye kurusha undi mukinnyi wese muri iri rushanwa (17).

Karim Benzema wa Real Madrid yatsinze igitego muri buri mukino, mu mikino 4 yose aheruka gukina muri UEFA Champions League. Amaze gutsinda ibitego bitanu byose hamwe.

Uyu mufaransa ashobora kuba umukinnyi wa gatatu utsinze ibitego bitanu mu mikino 5 yikurikiranya, muri aya marushanwa, nyuma ya Cristiano Ronaldo (inshuro enye, hagati ya 2013 na 2018) na Ruud van Nistelrooy mu 2007.

Sergio Ramos wakiniye Real Madrid imyaka irenga 15 akaza kuyisohokamo , na Lionel Messi wakiniye igihe kirekire FC Barcelona ndetse aba bakinnyi bakundaga guhangana cyane muri El Classico, uyu munsi bose baraza kuba bashyize hamwe bashaka uko batsinda Real Madrid.

Ni umukino ugiye gukinwa hamaze igihe hacicikana amakuru avuga ko rutahizamu Klyan Mbappe ukinira PSG, yamaze kumvikana na Real Madrid kuzayerekezamo ubwo uyu mwaka w’imikino uzaba urangiye.

Uyu mukino uraza kugaragaramo ishyaka no guhangana cyane, haba kuri aba bakinnyi bashaka kwihorera no kwerekana ko aho bagiye bakiri babandi, ndetse n’abanya-Espagne igihe cyose baba bashaka kugaragaza ko bari hejuru muri ruhago.

Uyu mukino uratangira saa Yine z’ijoro ku isaha ya Kigali, ukaba uza gusifurwa n’umutaliyani Daniele Orsato.

Undi mukino urahuza Sporting CP yo muri Portugal na Manchester City yo mu Bwongereza.