PSG vs Real Madrid: Karim Benzema yeretse Mbappe, Neymar na Messi ko atavugirwamo iyo ari mu rugo yandikisha amateka akomeye ku isi

Karim Benzema yaraye afashije Real Madrid gusezerera PSG ayitsinda ibitego 3 wenyine.

. Real Madrid yasezereye PSG muri Champions League

. Karim Benzema yatsinze ibitego 3 wenyine

. Mbappe na PSG baraye nabi kubera Benzema

 

Umukino wa 1/8 cy'irangiza cya Champions League 2022 wahuzaga Real Madrid na PSG wasize ibihe bibi kuri PSG yari yizeye ko igiye gukuramo Real Madrid ariko bikaza guhinduka mu minota 17 ubwo Karim Benzema yatsindaga ibitego 3 wenyine.

 

Ibi bitego Karim Benzema yatsinze byatumye afata ndetse anaca kuri Di Stefano mu bakinnyi batsindiye Real Madrid ibitego byinshi aho yagejeje ibitego 309 mu gihe Di Stefano afite 308. Igitego cya mbere Karim Benzema yatsindiye Real Madrid byari tariki 20 Nzeri 2009 ubwo bakinaga na Xereza ku mupira yari ahawe na Ruud van Nistelrooy.

Karim Benzema ubu ni umunyabigwi wa Real Madrid 

 

Akandi gahigo igitego cya 3 cya Benzema cyasize ni uko yahise afata Raul Gonzalez bose bakaba bafite ibitego 66 muri Champions League. Igitego cya mbere Karim Benzema yatsinze muri Champions League cyaje mu mwaka w'imikino 2004/05 mu gihe ibitego 8 muri ibyo byabonetse uyu mwaka.

 

Kuri ubu Karim Benzema amaze gutsinda ibitego 30 muri uyu mwaka w'imikino, aho abura igitego kimwe ngo ageze ku byo yatsinze mu mwaka ushize wose w'imikino ndetse akabura 2 ngo ageze ibitego 32 ari nabyo bitego byinshi yatsinze mu mateka ye mu mwaka umwe w'imikino ubwo yatozwaga na Jose Mourinho.