Sadio Mane yatsinze Benin ibitego 3 wenyine bituma aca agahigo katarakorwa n'undi mukinnyi mu ikipe ya Senegal

Ikipe y'igihugu ya Senegal yitegura guhura n'Amavubi mu mukino w'umunsi wa kabiri wo gushaka itike y'igikombe cy'Africa, yabanje kwihaniza Benin, rutahizamu Sadio Mane watsinze ibitego bitatu aca agahigo gashya.

 

Ku mugoroba wo kuri uyu wa Gatandatu, kuri Stade Me Abdoulaye Wade muri Senegal, habereye umukino wo gushaka itike y'igikombe cy'Africa cya 2023, warangiye 'Les Lions de la Teranga' ya Senegal itsinze 'Les Écureuils' ya Benin ibitego 3-1.

 

Muri uyu mukino w'itsinda 'L', Senegal na Benin bagiye mu mukino baramaze kumenya ko andi makipe bari mu itsinda rimwe y' u Rwanda na Mozambique yanganyije, mu mukino wa mbere w'itsinda wabaye kuwa Kane w'iki Cyumweru.

 

Senegal iheruka gutwara igikombe cy'Africa cya 2021 ikanabona itike yo gukina imikino ya nyuma y'igikombe cy'isi cya 2022 kizabera muri Qatar mu mpera z'uyu mwaka, yakinanye imbaraga nyinshi, bigaragara ko ihagaze neza kurusha Benin.

 

Mu bitatunguranye, Senegal niyo yafunguye amazamu ku munota wa wa 12 ubwo Sadio Mane yatsindaga neza Penaliti ndetse yongera kureba mu izamu nyuma y'iminota 10 gusa, ubwo ku munota wa 22' yaboneraga Les Lions de la Teranga igitego cya kabiri.

 

Umukino wakomeje gukomerera Benin ku munota wa 51' ubwo Saisi Almeida ukina hagati afasha ba myugariro yabonaga ikarita itukura, 'Les Écureuils' igasigarana abakinnyi 10 mu kibuga yari yakiriweho.

 

Kugabanuka kw'abakinnyi b'ikipe ya Benin byayiteye guhuzagurika no gukora amakosa menshi, bituma Senegal yongera kubona Penaliti ku munota wa 60 nayo yinjijwe neza na rutahizamu Sadio Mane.

 

Benin yabonye igitego cy'impozamarira ku munota wa 88' cyinjijwe na rutahizamu Junior Olitan nyuma yo guhabwa umupira mwiza na Oluwatosin Ayegun.

 

Sadio Mane usanzwe akinira Liverpool mu Bwongereza, ibitego 3 yatsinze Benin byahise bimugira umunya-Senegal umaze gutsindira ikipe y'igihugu ibitego byinshi mu mikino y'amarushanwa, aho yujuje 32.

 

Mbere y'uyu mukino, ibitego bya Sadio Mane mu ikipe y'igihugu mu mikino y'amarushanwa byari 29, aho yanganyaga na Henri Camara wakiniye Senegal imikino 99 kuva mu 1999 kugeza muri 2008.

 

Mu mikino y'umunsi wa kabiri wo gushaka itike y'igikombe cy'Africa, Senegal ya Sadio Mane izakirira Amavubi i Dakar kuri Stade ya Me Abdoulaye Wade, mu gihe Benin yo izaba yakiriye Mozambique i Porto-Novo.