#CHAN2023: Amavubi yasezerewe na Ethiopia ari mu rugo

Ikipe ya Ethiopia yabonye itike yo kwerekeza muri CHAN 2023 itsinze Amavubi yakiniraga muri stade nshya, Igitego kimwe ku busa.

 

Uyu munsi nibwo Amavubi yakiriye Ethiopia mu mukino wo kwishyura w’ijonjora rya nyuma ryo gushaka itike ya CHAN 2023,wabereye kuri stade ya Huye.

 

Umukino ubanza amakipe yombi yari yanganyirije muri Tanzania 0-0.

 

Ku munota wa 22, Serumogo Ally yahawe ikarita y’umuhondo ku ikosa yakoreye umukinnyi wa Ethiopia inyuma gato y’urubuga rw’amahina.

 

Iri kosa niryo ryavuyemo igitego cya Ethiopia kuri coup franc yatewe neza na Dawa Hutessa Dukele, umupira wijyana mu izamu.

 

Amavubi yashatse uko ahita yishyura iki gitego, ariko ishoti ryo ku munota wa 45 Haruna Niyonzima yatereye inyuma y’urubuga rw’amahina ariko rinyura hejuru y’izamu gato. Amakipe yagiye kuruhuka ari 1-0.

 

Mu gice cya kabiri, Amavubi yatangiye asatira cyane, ashyira igitutu kuri Ethiopia ndetse agenda arema amahirwe ariko kwinjiza igitego biranga.

 

Ku munota wa 72 Fiacre yarokoye Amavubi akuramo umupira wa rutahizamu wa Ethiopia bari basigaranye.

 

Amavubi yananiwe kwishyura iki gitego birangira atageze muri CHAN 2023 yari kuba iya gatanu yitabiriye.

 

Ni ku nshuro ya Gatatu Amavubi ananiwe kubona itike ya CHAN (2009, 2014 & 2023). Ni ku nshuro ya 2, Amavubi asezerewe na Ethiopia (2014 & 2023).