Perezida Xi Jinping w’u Bushinwa yaba yahiritswe ku butegetsi

Amakuru u Bushinwa butaragira icyo buvugaho aravuga ko Perezida wabwo, Xi Jinping yaba yahiritswe ku butegetsi.

Ibihuha by'uko Perezida Xi Jinping yaba yahiritswe ku butegetsi byatangiye guhwihwiswa kuva mu gitondo cyo kuri uyu wa Gatandatu, mbere yo gufata indi ntera kuri murandasi.

Kuri ubu ijambo u Bushinwa n'izina Xi ni amwe mu yari kuvugwaho cyane (Trending) ku mbuga nkoranyambaga cyane urwa Twitter; bikavugwa ko Perezida w'u Bushinwa nyuma yo guhirikwa ku butegetsi yahise afungirwa iwe mu rugo.

Aya makuru ari gutizwa umurindi ahanini n'amafoto ndetse n'amashusho menshi y'imodoka z'intambara zagaragaye zerekeza mu murwa mukuru w'u Bushinwa, Beijing.

Perezida Xi Jinping biri guhwihwiswa ko yaba yatembagajwe, nyuma y'umunsi umwe Fu Zhenghua wahoze ari Minisitiri w'Ubutabera mu Bushinwa akatiwe urwo gupfa, nyuma yo guhamywa ibyaha bya ruswa.

Ni icyemezo bamwe bafashe nk'umugambi wa Perezida Xi wo kwikiza abatavuga rumwe na we.

Amakuru avuga ko uyu muyobozi w'Ikirenga w'u Bushinwa akimara guhirikwa ku butegetsi, yahise asimburwa na Gen Li Qiaoming, umwe mu basirikare bakomeye mu gisirikare cy'u Bushinwa.