Adil yasubiye i Burayi avuga ko agiye kurega APR FC muri FIFA
Mu ijoro ryakeye, umutoza Adil Erradi Mohammed wari umaze imyaka 3 muri APR FC, yerekeje mu Bubiligi yitotomba nyuma yo guhagarikwa ukwezi mu kazi. Ni mu gihe bivugwa ko umunya-Brazi Robertinho ashobora gutoza APR FC mu minsi iri imbere.
Adil yasubiye mu Bubiligi nyuma y'iminsi 10 ishize ahagaritswe ku mwanya w'umutoza mukuru wa APR FC ashinjwa imyitwarire mibi, ibyo avuga ko bitubahirije amategeko kandi ko azatanga ikirego mu Impuzamashyirahamwe y'umupira w'amaguru ku isi.
Uyu mutoza w'umunya-Marooc yahagaritswe n'ikipe y'ingabo ku ya 14 Ukwakira 2022, nyuma yo kumvikana mu itangazamakuru anenga benshi mu bakinnyi bakuru bayo, byaje nyuma yo gusezererwa mu marushanwa Nyafurika ya CAF Champions League.
Ubwo yari ku kibuga cy'indege ataha, Adil yabwiye abanyamakuru ko agiye kwifashisha inzira y'amategeko muri FIFA, kugira ngo ikibazo cye gikemuke, kuko yemera ko yahagaritswe mu buryo budakurikije amategeko.
Kuwa Gatandatu w'icyumweru gishize, ku mbuga nkoranyambaga hakwirakwiye amakuru yavugaga ko APR FC yirukanye burundu umutoza Adil, ibyo ubuyobozi bw'iyi kipe bwahise bunyomoza buvuga ko akiri umutoza wayo.
Umutoza Adil we yavuze ko we n'abanyamategeko be batatu bari mu nzira yo kugana inkiko ngo barege APR FC yamuhagaritse 'Mu buryo budakurikije amategeko' kandi yamusuzuguye mu gihe yiyizi nk'umutoza ufite izina rikomeye.
Uyu mugabo w'imyaka 44 y'amavuko yasubiye i Burayi acyitotombera guhagarikwa mu kazi, bizatuma ajyana APR FC mu nkiko, mu gihe ku rundi ruhande hari amakuru avuga ko APR FC nayo yiteguye isaha n'isaha kwitaba FIFA ikerekana amakosa Adil Erradi yakoze.
Adil yafashe indege mu ijoro
Adil Erradi yananiranywe na APR FC nyuma y'imyaka isaga 3 yari amaze ayibereye umutoza, aho yayifashije kwegukana ibikombe bitatu bya Shampiyona, Igikombe cy'intwari cya 2020 ndetse n'igihuza amakipe ya Gisirikare yo muri Africa y'i Burasirazuba yakuye muri Kenya mu mwaka wa 2019.
Kuri ubu, haravugwa amakuru ko APR FC yatangiye ibiganiro n'umunya-Brazil Roberto Calmo Oliveira 'Robertinho' isaba ko yayibera umutoza mukuru, akava muri Vipers yo muri Uganda bari kumwe.
Robertinho wanyuze muri Rayon Sports muri 2019, akayifasha mu mikino y'amatsinda ya CAF Confederations Cup, asanzwe ahembwa Amadorari y'America 4000 (Asaga Miliyoni 4 FRW) ku kwezi, ayo APR FC yiteguye gukuba kabiri mu gihe yaba ayisinyiye.
Robertinho ashobora kuva muri Vipers SC aza muri APR FC