Korea y'Epfo yihimuye kuri Korea ya Ruguru iheruka kurasa ibisasu mu nkengero z'imipaka yayo

Koreya ya Ruguru na Koreya y’Epfo ku nshuro ya mbere zarashe misile hakurya y’umupaka wo ku nyanja w’ibi bihugu.

Koreya y’Epfo yihimuye kuri uyu wa gatatu, nyuma y’amasaha atatu Koreya ya Ruguru irashe misile yaguye mu ntera itageze kuri kilometero 60 uvuye mu mujyi wa Sokcho wo mu burasirazuba bwa Koreya y’Epfo.

Iyo misile yatumye ku kirwa cya Ulleungdo cyo muri Koreya y’Epfo hatangwa impuruza yo kuburira abahatuye ku byago byo mu kirere, basabwa kujya mu bwihisho bwo munsi y’ubutaka.

Nyuma yaho, Koreya y’Epfo yarashe misile eshatu mu gusubiza Koreya ya Ruguru.

Perezida wa Koreya y’Epfo Yoon Suk-yeol yari yavuze ko iryo raswa rya misile ya Koreya ya Ruguru ari "igitero ku butaka" bw’igihugu cye.

Igisirikare cya Koreya y’Epfo cyavuze ko mu gitondo cyo kuri uyu wa gatatu, Koreya ya Ruguru yarashe misile zitari munsi ya 10 "mu burasirazuba no mu burengerazuba".

Nyuma yaho kuri uyu wa gatatu, igisirikare cya Koreya y’Epfo cyavuze ko cyarashe misile eshatu zirasirwa mu kirere zerekezwa ku butaka, zerekejwe mu majyaruguru y’umupaka wayo wo ku nyanja, mu gusubiza ku iraswa rya misile rya Koreya ya Ruguru.

Mbere yaho, Koreya y’Epfo yari yavuze ko igisirikare cyayo kidashobora "kwihanganira ubu bwoko bw’igikorwa cy’ubushotoranyi cya Koreya ya Ruguru, kandi [igisirikare] kizasubiza bikomeye bijyanye n’ubufatanye bwa hafi bwa Koreya y’Epfo n’Amerika", nkuko abayobozi bakuru b’ingabo babivuze mu itangazo.

Bongeyeho ko Perezida wa Koreya y’Epfo Yoon Suk-yeol yari yategetse "igisubizo cyihuse" kuri ubwo bushotoranyi bushya.

Abategetsi ba Koreya y’Epfo n’Ubuyapani batumijeho inama ku mutekano w’igihugu, bijyanye n’izi misile zindi Koreya ya Ruguru yarashe.

Ibyo bihugu byombi byari byabonye izo misile mbere gato ya saa tatu zo mu gitondo (9h) cyo kuri uyu wa gatatu, harimo n’imwe yarenze umurongo uzwi nka Northern Limit Line - uyu murongo urebye ukaba ari wo mupaka wo mu nyanja.

Iyo misile yaguye mu mazi yo muri kilometero 26 mu majyepfo y’umurongo w’urubibi (imbibi), kuri kilometero 57 mu burasirazuba bw’umujyi wa Sokcho wo muri Koreya y’Epfo, hakaba no kuri kilometero 167 mu majyaruguru ashyira uburengerazuba bw’ikirwa cya Ulleungdo.

Kang Shin-chul, ukuriye ibikorwa mu buyobozi bukuru bw’ingabo, yavuze ko ibi ari ibintu "bidasanzwe na gato kandi bitakwihanganirwa" kuko iyo misile yaguye hafi y’"amazi yo ku butaka yo mu majyepfo y’umurongo w’umupaka ku nshuro ya mbere" kuva uyu mwigimbakirwa wacikamo kabiri.

Koreya ya Ruguru irashe izi misile nyuma y’umunsi iburiye Amerika na Koreya y’Epfo ngo bireke imyitozo ya gisirikare birimo gukorana muri iki cyumweru mu nkengero z’uyu mwigimbakirwa.

Ku wa kabiri, Koreya ya Ruguru yakangishije ko niba ibyo bihugu bibiri by’inshuti bidahagaritse iyo myitozo yabyo, izafata ingamba "zikomeye".

Misile Koreya ya Ruguru yarashe kuri uyu wa gatatu, zije zikurikira izindi yarashe mu kwezi gushize, na zo yavuze ko zari izo gusubiza ku myitozo ihuriweho y’Amerika, Koreya y’Epfo n’Ubuyapani.

Icyo gihe, Koreya ya Ruguru yavuze ko uko gusubiza kwayo ari "ukwigana" uko igitero cya nikleyeri cyayo kuri Koreya y’Epfo cyagenda.

BBC