Donald Trump n'uwamusimbuye Joe Biden bongeye guhangana mu matora akomeye
Perezida Joe Biden n’uwo yasimbuye Donald Trump bateguye amakoraniro akomeye yo kurwanira amajwi mu kwiyamamaza mu matora yo kwinjira mu nteko ishingamategeko mu mitwe yombi.
Ejo ku Cyumweru, Biden na Trump biyamamarije i New York na Florida umwe umwe.
Amahirwe menshi ari ku ruhande rw’Abarepubulika barimo kugerageza gushaka kwigarurira impande zombi ni ukuvuga kwigarurira abadepite n’abasenateri aho izi nteko zombi zigenzurwa n’abo mu ishyaka ry’aba-Democrats.
Bahabwa amahirwe menshi yo gutsindira Inteko ishingamategeko umutwe w’Abadepite, ariko abasenateri ni itombora, nk’uko amajwi abyerekana.
Mu gihe baramuka batsinze uruhande rumwe, byagira ingaruka zikomeye cyane ku myiteguro ya Perezida Biden.
Mu gihe umunsi wa nyuma wo kwiyamamaza ari kuri uyu wa mbere, ishyaka rye ryiteguye gutsindwa no mu turere bisanzwe bizwi ko ari utw’aba-Democrats.
Mu ijambo rye, Biden yavuze ko aya matora ari "igihe cyo gufata umurongo" uzagena imyaka 20 iri imbere. Yabwiye abatora ku ishuri rya kaminuza Sarah Lawrence College ko barimo gutora hagati y’ibyerekezo bibiri bikomeye kandi bitandukanye bya Amerika”.
Ni mu gihe uwo yasimbuye muri Maison Blanche/White House, Donald Trump, yari i Miami aho yavugiye ijambo mu gihe kirenga isaha,yibasira aba-Democrats, ashinja ko barimo gutwara igihugu mu matwara ya “gikomuniste”.
Trump yabwiye abari aho ati: "Aba-Democrats bashaka guhindura Amerika bayigire Cuba y’abakomunista cyangwa Venezuela y’abasosiyalisti”.
Yakomeje ati: "Ku munyamerika w’umunya Espagne wese muri Florida no mu gihugu cyose, tukwakirije yombi mu ishyaka ryacu [Abarepubulikani]).
Trump yakomeje kandi yerekana ko ashobora kongera kwiyamamariza kuyobora Amerika mu matora y’umukuru w’igihugu azaba mu 2024, abwira abatora ko bakomeza gukurikira kwiyamamaza kwe kuri uyu wa mbere i Ohio.
BBC