As Kigali yanyagiye Kiyovu Sports iturutse inyma ihita ifata umwanya w'icyubahiro
As Kigali yatsinze Kiyovu Sports 4-2
As Kigali iyoboye shampiyona n'amanota 23
Ikipe ya AS Kigali yafashe by'agateganyo umwanya wa mbere ku rutonde rwa shampiyona y'u Rwanda, nyuma yo kunyagira Kiyovu Sports ibitego 4-2.
Aya makipe yombi y'abanya-Kigali yari yahuriye kuri Stade ya Kigali i Nyamirambo, mu mukino w'umunsi wa 12 wa shampiyona y'u Rwanda.
Ni umukino AS Kigali yatsinze iturutse inyuma, dore ko Kiyovu Sports yari yayibanje ibitego bibiri.
Ni ibitego byo mu gice cya mbere cy'umukino by'Umugande Elissa Ssekisambu ndetse na myugariro Ndayishimiye Thierry.
AS Kigali yishyuye ibi bitego inabona bibiri by'agashinguracumu biciye kuri Kakule Mugheni Fabrice, Félix Koné Lotin na Shaban Hussein watsinze ibitego bibiri wenyine.
Iyi kipe y'umutoza Cassa Mbungo André nyuma yo gutsinda Kiyovu Sports yahise ifata umwanya wa mbere by'agateganyo n'amanota 23, ikaba irusha abiri Rayon Sports iyikurikiye.