WorldCup: Ikipe ya Senegal yahuye n'ikibazo gikomeye mbere yo kwesurana n'Ubwongereza kuri iki Cyumweru

Amakuru avuga ko umutoza wa Senegal, Aliou Cisse atameze neza ndetse ko ashobora kutagaragara ku mukino ikipe ya Senegal iri bukine n'Ubwongereza mu rwego rwo gushaka itike ya 1/4 cy'igikombe cy'isi.

Aliou Cisse wahoze akinira ikipe ya Birmingham na Portsmouth yegukanye igikombe cya Afurika giheruka ndetse akaba yarabashije we n'abasore be kurenga amatsinda y'igikombe cy'isi ibintu baherukaga gukora mu mwaka wa 2002.

Cisse kandi yari mu ikipe yatsinze Ubufaransa mu mukino wo gufungura igikombe cy'isi ikaza gusezererwa na Turukiya muri 1/4.

Cisse yatangiye kubura guhera kuri uyu wa Gatandatu habura umunsi umwe gusa ngo Senegal icakirane n'Ubwongereza aho atabashije kwitabira ibiganiro n'abanyamakuru. Gusa bivugwa ko atanabashije kwitabira imyitozo ya Senegal yo ku wa Gatanu nimugoroba.

Umwungiriza we, Regis Bogaer yagize ati: "Amaze iminsi nk'ibiri arwaye. Ni twe twakoresheje imyitozo ku munsi w'ejo birumvikana twifashishije amabwiriza yaduhaye. Turizera ko ejo azabasha kuba ari kumwe n'ikipe . Nakwemeza ko arwaye kandi n'umuriro wazamutsemo gake ni yo mpamvu tugomba kwitondera ubuzima bwe."

N'ubwo Cisse arwaye umutoza wungirije avuga ko Senegal yiteguye neza. Yagize ati: "Turatuje kandi turiyizeye. Tuzi neza ko dushobora gutsinda Ubwongereza. Ibyo ni byo twifuza. Nzi ko turi bushyuhe mu mutwe gake uko tugenda twegera igihe cyo gukina ariko ik'ingenzi ni ukuguma umuntu atuje maze agatumbira intego. Intego yacu ni ukugera mu kiciro gikurikiyeho."

Cisse yatangiye gutoza Senegal kuva muri 2015 akaba aheruka kuyigeza mu mikino yo gukuranwamo mu gikombe cy'isi cya 2018.

Yahoo.com