Karim Benzema yamaze gusezera mu ikipe y'igihugu y'Ubufaransa

Rutahizamu Karim Benzema yamaze gusezera mu kipe y'Igihugu y'u Bufaransa 'Les Bleus', nyuma y'igihe gito yemerewe kongera kuyigarukamo.

Benzema yatangaje isezera rye mu butumwa yanyujije ku rubuga rwe rwa Twitter. Ni ubutumwa bwari buherekeje ifoto ye yambaye umwambaro w'Ikipe y'Igihugu y'u Bufaransa.

Yagize ati: "Nashyizemo ingufu nkora n'amakosa kugira ngo mbe aho ndi uyu munsi kandi binteye ishema. Nanditse amateka yanjye hanyuma ayacu ageze ku iherezo."

Karim Benzema w'imyaka 35 y'amavuko, yasezeye mu kipe y'u Bufaransa nyuma yo kunanirwa kuyikinira mu mikino y'Igikombe cy'Isi cya 2022 kubera imvune. Benzema yari yahamagawe mu bakinnyi u Bufaransa bwagombaga kwifashisha mu Gikombe cy'Isi, gusa aza kuvanwa mu kipe nyuma y'imvune yagize mbere gato y'uko gitangira.

Muri Gicurasi umwaka ushize ni bwo uyu rutahizamu wa Real Madrid yari yongeye guhamagarwa mu kipe y'Abafaransa, nyuma y'imyaka itanu yarayirukanwemo. Ni nyuma yo gushinjwa kugira uruhare mu gushyira hanze amashusho y'urukozasoni ya mugenzi we Mathieu Valbuena.

Benzema yongeye guhamagarwa n'umutoza Didier Deschamps, kugira ngo afashe u Bufaransa mu mikino y'Igikombe cy'u Burayi (Euro) cya 2022. Ni imikino yarangiye Les Bleus batarenze umutaru nyuma yo gusezererwa n'u Busuwisi muri ⅛ cy'irangiza kuri Penaliti 5-4; bijyanye no kuba umukino wari warangiye amakipe yombi anganya ibitego 3-3.

Euro 2020 yarangiye Karim Benzema atsindiye u Bufaransa ibitego bine, arushwa kimwe na Cristiano Ronaldo warangije iri rushanwa ayoboye abatsinze ibitego byinshi.

Benzema ukomoka ku babyeyi b'abanya-Algérie, yari umukinnyi w'Ikipe y'Igihugu y'u Bufaransa kuva muri 2007 ubwo yayihamagarwagamo ku nshuro ye ya mbere.

Mu myaka 15 yari amaze ayikinira, yari amaze kuyitsindira ibitego 37 mu mikino 97 yari amaze kuyikinira.