Rayon Sports yakubiswe ikinyafu na Etincelles FC mu mukino warangiye benda kurwana

Umukino wahuje ikipe ya ETINCELLES FC na Rayon Sports wabereye kuri Stade Umuganda, warangiye ikipe ya Etincelles FC yari iwayo itsinze Rayon Sports yari yayisuye. Etincelles FC yatsinze 3 kuri 2 Rayon sports, byaje guteza imvururu mu kibuga hafi no kurwana.

Ibitego byagiyemo bikurikirana mu gice cya mbere, aho ikipe ya Etincelles FC yarushaga Rayon Sports imbaraga mu buryo bugaragara, dore ko yari imbere y'abafana bayo.

Nyirinkindi Saleh na Niyonsenga Ibrahim bazengereje ikipe ya Rayon Sports mu buryo budasanzwe mu gice cya mbere ndetse n'icya kabiri cy'umukino, dore ko nta gahenge Etincelles FC yahaye iyi kipe yari ifite Umwanya wa Mbere muri Shampiyona y'u Rwanda.

Igitego cyagiyemo ku munota wa mbere w'igice cya mbere ku ruhande rwa Etincelles FC, cyatsinzwe na Rutahizamu wazonze Rayon Sports Niyonzima Ibrahim ndetse atsinda n'icyakurikiye.

Ku munota wa 64, Rudasingwa Prince yafashije ikipe ya Rayon Sports kubona igitego kimwe, cyaje nyuma yo kutumvikana hagati y'abakinnyi b'inyuma ba Etincelles FC maze umuzamu wa Etincelles Kambale ntiyamenya uko bigenze.

Kuva ku munota wa 70, ikipe ya Rayon Sports yatangiye gusatira izamu rya Kambale yizeye ko iza kubona ibindi bitego 2 byo kwishyura yari yatsinzwe na Etincelles FC mu gice cya mbere, harimo n'igitego cya Penaliti.

Musa Kamara ukomoka mu gihugu cya Mali yatsinze igitego cya 2  ku ruhande rw'ikipe ya Rayon Sports, umuriro uraka Stade Umuganda yuzura amajwi y'abafana ba Rayon Sports.

Nyuma y'umukino umutoza wa Rayon Sports Haringingo François yavuze ko nta magambo menshi afite kuri uyu mukino wasojwe n'imvururu, ku ruhande rwo kuregera imisifurire avuga ko ubuyobozi bw'ikipe aribwo bireba ngo na cyane ko we agiye kwibanda kuyindi mikino.

Ku ruhande rw'ikipe ya Etincelles FC, umutoza yavuze ko ari ibyishimo cyane ku ikipe ye, asobanura ko igikomeje ari ukwitegura indi mikino itaha.