M23 yahawe igihe ntarengwa cyo kuba yarekuye utundi duce 2

Ku wa Gatandatu tariki ya 31 Ukuboza 2022, Ingabo z'Umuryango wa Afurika y'Iburasirazuba (EAC) zasabye umutwe wa M23 kuba wamaze kuva mu duce twa Kishishe na Rumangabo, bitarenze ku wa Kane tariki ya 05 Mutarama 2023.

Ni ibikubiye mu itangazo rigenewe abanyamakuru ryasohowe nyuma y'inama Ingabo za EAC n'urwego rwa EJVM bagiranye na M23.

Iyo nama yabereye i Kibumba, yari iyobowe na Maj. Gen Jeff Nyagah ukuriye Ingabo za EAC ziri muri Repubulika Iharanira Demokarasi ya Congo.

Itangazo rivuga ko Ingabo za EAC zatangiye kugenzura Kibumba, nyuma y'uko abarwanyi ba M23 bemeye kuyivamo.

Iri tangazo kandi rivuga ko EAC na EJVM basabye M23 na FARDC gukomeza kubahiriza imyanzuro y'inama y'i Luanda yo ku wa 23 Ugushyingo 2021, ndetse n'iya Nairobi.

Ryasabye abagiraneza kandi gutabara ibihumbi by'abanye-Congo bavuye mu byabo mbere yo guhungira mu nkengero z'Umujyi wa Goma ndetse n'ibindi bice by'Intara ya Kivu y'Amajyaruguru.