Umwana wa Perezida yagurishije indege y'igihugu mu ibanga

Umwe mu bana ba Perezida wa Equatorial Guinea yatawe muri yombi azira kugurisha mu buryo butemewe indege ya kompanyi y’igihugu.

Uyu mwana wa Perezida witwa Ruslan Obiang Nsue,arashinjwa kugurisha indege ya national airline,nkuko TV y’igihugu yabitangaje ku wa Kabiri.

Perezida Teodoro Obiang Nguema Mbasogo ayoboye igihugu kuva 1979,ariko umuhungu we Ruslan Obiang Nsue, arafunzwe guhera kuwa mbere.

Televiziyo ya TVGE yavuze ko abayobozi bafunguye iperereza mu Ugushyingo 2022 nyuma yo kuvumbura ko indege ya ATR 72-500 ya kompanyi Ceiba Intercontinental yaburiwe irengero.

Iyi ndege yoherejwe muri Espagne muri 2018 kugira ngo bayikanike nkuko TVGE ibitangaza ariko nyuma iza kubura aho bikekwa ko uyu muhungu wa Perezida yayiriye.

Obiang bikekwa ko yayigurishije Binter Technic,kompanyi ikanika ikorera ahitwa Las Palmas ku kirwa cya Grand Canary.

Iyi ndege ya ATR 72-500yakozwe muri 1980 n’Umufaransa akaba n’umutaliyani ATR ikaba itwara abagenzi 74.

Ruslan Obiang Nsue yigeze kuba Minisitiri wa Siporo n’Urubyiruko nyuma aza kuba umuyobozi mukuru w’iyo kompanyi y’indege mbere y’uko agirwa umuyobozi mukuru w’ibigo bitanga serivisi ku kibuga cy’indege, Ceiba Aeropuertos.

Umuvandimwe we bavukana kuri se,usanzwe ari Visi Perezida wa Equatorial Guinea, Teodoro Nguema Obiang Mangue yanditse kuri Twitter ko Ruslan Obiang yemeye ko ari we wagurishije iyo ndege.

Yagize ati “Siniteguye kugendera ku marangamutima y’umuryango ngo mbe namufasha mu buryo bumwe cyangwa ubundi, iyi ni nayo mpamvu nategetse ko bamuta muri yombi byihuse akajyanwa mu butabera.”

Visi Perezida Nguema Obiang Mangue kandi yasabye Perezida kwirukana uyu muhungu we mu mirimo yose yari afite muri iyi kompanyi y’ubwikorezi kubera ibi byaha byo kugurisha iyo ndege.