Cristiano Ronaldo yongeye guhura n'uruva gusenya muri Al Nassr asigaye akinira

Rutahizamu Cristiano Ronaldo yongeye kunanirwa gufasha Al-Nassr akinira kubona intsinzi, mu mukino we wa Kabiri yakiniraga iyi kipe.

Uyu munya-Portugal na bagenzi be bakinana mu ijoro ryakeye bari bahuye na Al-Ittihad, mu mukino wa ½ cy'irangiza cya Super Coupe ya Arabie Saoudite warangiye batsinzwe ibitego 3-1.

Ni umukino wa kabiri Ronaldo utarabasha gutsindira Al-Nassr igitego yayikiniraga.

Igikomeye uyu mukinnyi yakoze muri uyu mukino ni uburyo yabonye mbere gato y'uko igice cya mbere cy'umukino kirangira, ubwo yatumbagiraga mu kirere agatera umupira uremereye mu izamu ariko ugakurwamo n'umunyezamu Marcelo Grohe wa Al-Ittihad.

Iyi Al-Ittihad yafunguye amazamu ku munota wa 15 w'umukiino ibifashijwemo n'umunya-Brésil Romário Ricardo da Silva bita Romarinho, mbere y'uko Abderrazak Hamdallah ayitsindira igitego cya kabiri ku munota wa 43 w'umukino.

Uyu munya-Maroc watsinze igitego nyuma y'uburyo Cristiano yari amaze guhusha, yishimiye yacyishimiye yigana Lionel Messi ubwo muri 2017 yatsindaga igitego ku munota wa nyuma w'umukino wahuzaga Real Madrid na FC Barcelona.

Hamdallah na we yavanyemo umupira yari yambaye awereka abafana ba Al-Nassr, mu rwego rwo gukoba Cristiano Ronaldo.

Ni Cristiano bikimara watunzweho imfatamashusho (Camera), agaragara yikoreye amaboko kubera umujinya.

Al-Nassr yabonye impozamarira ku munota wa 67 biciye ku munya-Brésil Anderson Souza Conceição bita Talisca, mbere y'uko Al-Shaqeeti ashimangira intsinzi ya Al-Ittihad mu minota ya nyuma y'umukino.

Kugeza ubu Ronaldo mu mikino ibiri amaze gukinira Al-Nassr, yashoboye gutera ishoti rimwe ryonyine rigana mu izamu.