Umusifuzi watumye Arsenal inganya yasezeye mu kazi

Umusifuzi Lee Mason wari kuri VAR mu mukino rsenal yanganyije na Brentford igitego 1-1,yasezeye ku mirimo ye nyuma yo kutabona ikosa ryo kurarira ku gitego cyo kwishyura Brentford yatsinze.

Uyu mugabo ukomoka i Manchester, yasezeye mu muryango wa PGMOL w’abasifuzi ku bushake bwe nyuma y’aho umuyobozi we Howard Webb asabiye imbabazi Arsenal.

Mason w’imyaka 51,yananiwe kubona kurarira kwabaye mu kubaka igitego Brentford yishyuye Arsenal kuwa Gatandatu w’icyumweru gishize amakipe yombi anganya 1-1 kuri Emirates.

Kubera iyo mpamvu yahise ahagarikwa gusifura imikino yo muri iyi weekend.

Uyu mugabo yahise asezera mu muryango w’abasifuzi nyuma y’imyaka 15 awurimo.

Uyu yari yarasezeye ku kazi ko gusifura mu kibuga hagati nyuma y’umwaka w’imikino 2020-21, Mason yakoraga gusa kuri VAR.

Itangazo ryo gusezera kwe rigira riti "PGMOL iremeza ko ukoresha ikoranabuhanga rifasha abasifuzi,Lee Mason yasezeye mu muryango kubera impamvu ze bwite.

"Lee yabaye umusifuzi wa Premier League mu myaka 15,asifura imikino 287 yo mu cyiciro cya mbere muri icyo gihe,aho yasoje mu mwaka w’imikino 2021/22. Umwuga we wose mu marushanwa y’ababigize umwuga watumye uyu mugabo w’imyaka 51 asifura imikino irenga 500 nyuma yo kuzamurwa muri 1998.

Turashaka gushimira Lee kubera akazi keza yakoreye umukino w’ababigize umwuga kandi turamwifuriza ibyiza ahazaza."

PGMOL yandikiye Arsenal iyisaba imbabazi ariko Mikel Arteta yanze kuzitanga kuko ngo ntizagarura amanota 2 yatakaje none ubu akaba anganya amanota 51 na Man City ya mbere.