RDC: Ikirunga cya Nyamurangira cyongeye kuruka abaturage b'i Goma bahabwa ubutumwa

Ikigo cy’i Goma gishinzwe gukurikirana ibirunga cyagiriye inama abatuye muri uyu mujyi mu gihe Nyamulagira ikomeje kuruka guhera ku mugoroba w’uyu wa 20 Gicurasi 2023.

Umuyobozi w’iki kigo kizwi nka OVG, Dr Muhindo Adalbert, yamenyesheje abatuye i Goma ko kuva saa kumi n’ebyiri n’igice z’umugoroba, Nyamulagira iri kuruka yerekeza mu burengerazuba, muri Pariki ya Virunga.

Aba baturage bategujwe ko umuyaga ushobora gutwara ibinyabutabire bituruka mu mahindure y’iki kirunga ahantu hatuwe, bityo bakaba basabwa kwirinda kunywa amazi y’imvura no kuyogesha imboga zo guteka.

Kugeza mu gitondo cy’uyu wa 21 Gicurasi, abatuye i Goma basabwe gutuza. OVG yabasezeranyije gukomeza gukurikirana imyitwariye y’iki kirunga, kandi havutse ikibazo ngo yabibamenyesha.