FC Barcelone izakomeza guhemba Lionel Messi kugeza muri 2025 kabone n'ubwo atakibakinira

Ikipe ya FC Barcelona izahemba uwahoze ari umukinnyi wayo ari we Lionel Messi kugera mu mwaka wa 2025.

Umukino wa mbere Messi yakinnye nk'uwabigize umwuga muri FC Barcelona, hari mu mwaka wa 2004. Kuva icyo gihe yakinnye imikino 778, atsindamo ibitego 672. Afatwa nk'umwe mu bakinnyi b'ibihe byose muri iyi kipe. Yabafashije gutwara ibikombe 4 bya Champions League, 10 bya shampiyona ya Espagne ndetse na 7 bya Copa Del Reys.

Muri 2021 Messi yaje kuva muri FC Barcelona kubera ubukene iyi kipe yari ifite, yerekeza mu ikipe yo mu Bufaransa ya Paris Saint-Germain ahasinya amasezerano y'imyaka 2.  Yakinnyeyo imikino 75, atsindamo ibitego 32 anatwarayo Ibikombe 2 bya shampiyona y'icyiciro cya mbere mu Bufaransa (Ligue 1).

Mu mpeshyi y'uyu mwaka ni bwo byamenyekanye ko Messi atazongera amasezerano muri PSG, FC Barcelona itangira kuvugwa mu kuba yagarura umwana mu rugo ariko birangira bidakunze kuko mukinnyi ufite Balloon d'Or 7 yahisemo kujya gukina muri Inter Miami yo muri Leta Zunze Ubumwe za Amerika.

Nubwo bimeze gutyo ariko FC Barcelona izakomeza kwishyura Lionel Messi kugeza mu mwaka wa 2025.

Nk'uko Perezida w'iyi kipe Joan Laporta yabitangaje, hari amafaranga bagiye basigaramo uyu mukinnyi igihe yari akibakinira kandi bemeje ko bazagenda bayamwishyura gake gake kugeza ashizemo mu myaka 2 iri imbere.