Machester City yatsinze imvura y'ibitego naho Chelsea yongera gukubitwa yicaye

Ikipe ya Manchester City ibifashijwemo na Erling Haaland yanyagiye Fulham naho ikipe ya Chelsea idashimwa kabiri biricurika itsindwa na Nottingham Forest muri Premier League.

Iyi mikino yo ku munsi wa 4 wa shampiyona y'icyiciro cya mbere mu Bwongereza yabaye kuri uyu wa Gatandatu taliki 2 Nzeri 2023 saa kumi.

Ku kibuga, Etihad, Manchester City ni yo yari yakiriye Fulham. Ikipe ya Manchester City idafite umutoza wayo mukuru kubera ikibazo cy'uburwayi, yakoze ibyari byitezwe itsinda Fulham nta kubabarira ibitego 5-1.

Ibi bitego byatsinzwe na Alvarez ku munota wa 31, myugariro Nathan Ake kuwa 45+5 naho ibindi 3 bitsindwa na Erling Haaland kuwa 58, kuwa 70 kuri penariti ndetse no kuwa 90+5. Ikimpozamarira cya Fulham cyatsinzwe na Ream ku munota wa 33.

Mu mujyi w'i Londre ho ikipe ya Chelsea yaherukaga gushimisha abafana bayo muri shampiyona itsinda Luton Town,  yatunguranye ikubitwa na Nottingham Forest igitego 1 cyabonetse ku munota wa 48 gitsinzwe na Elanga.

Ikipe ya Tottenham Hotspur nayo imeze nabi muri iyi minsi yanyagiye Burnley ibitego 5-2. Ku ruhande rwa Burnley yari iri mu rugo ibitego byayo byatsinzwe na Lyle Foster na Brownhill naho ibya Tottenham Hotspur bitsindwa na Son Heung-Min watsinze 3 wenyine, Romero na Maddison.

Ku mikino itegerejwe ku munsi w'ejo, ikipe ya Liverpool izakina na Aston Villa saa kumi n'imwe naho Arsenal yakire Manchester United saa kumi n'imwe n'iminota 30.

Erling Haaland yatsinze ibitego 3 wenyine 

Son yatsindiye Tottenham ibitego 3

Igitego Nottingham Forest yatsinze Chelsea