Ibyo Abafana Bakoreye umuherwe wa Chelsea Nyuma Yo Gutsindwa Na Aston Villa Biteye Agahinda- IFOTO
Abaherwe Ba Chelsea Bakijijwe N'amaguru Bagiye Gukubitwa N'abafana
Ikipe Ya Chelsea Yaraye Itsindiwe Ku Kibuga Cyayo Bibabaza Abafana
Chelsea Yashoye Amafaranga Menshi Igura Abakinnyi Ikomeje Kuririra Mu Myotsi.
Chelsea Ifite Amanota 5 Gusa Mu Mikino 6 Imaze Gukina
Mauricio Pochettino Yaba Agiye Gusezererwa Na Chelsea
Ku mbuga nkoranyambaga na mpuzabantu nta kindi kigezweho uretse agafoto k'abaherwe ba Chelsea biruka kibuno mpa amaguru nyuma yo kuvudukanwa n'abafana b'iyi kipe ubwo bari bamaze gucishwa bugufi n'ikipe ya Aston Villa.
Ku munsi w'ejo ikipe ya Chelsea izwi nka 'The Blues" yaraye ikubiswe ahababaza n'ikipe ya Aston Villa mu mukino w'umunsi wa 6 wa Shampiyona y'Ubwongereza- Ibintu byaviriyemo ibyago bikomeye cyane abaherwe b'iyi kipe.
Abafana b'iyi kipe bakomeje kubabazwa ubutitsa n'ikipe yabo bihebeye ku munsi w'ejo bananiwe kwiyumanganya ubwo bakorwaga mu matama n'ikipe ya Aston Villa.
Nyuma y'uko Aston Villa itsindiye Chelsea i Stamford Bridge igitego 1-0 abafana b'iyi kipe y'i London bahisemo kwiruka inyuma y'umuherwe Behdad Eghbali bashaka kumugirira nabi.
Amakuru dukesha ikinyamakuru 'Metro' cyandikirwa hariya mu Bwongereza avuga ko uyu muherwe uteraniye ikipe na Todd Boehly yakijijwe n'abashinzwe umutekano abafana bamwanjamye.
Umuherwe w'ikipe ya Chelsea wambeye ipantalo y'umweru yakijijwe n'amaguru ubwo yari amerewe nabi n'abafana bari barakaye.
Mu majwi yumvikanye y'abafana bamwe bamwirukaga inyuma bamubazaga impamvu bakomeje kubababariza imitima batsindwa umusubirizo.
Nyamara n'ubwo abafana bariye karungu bahata ibibazo aba baherwe ntacyo batakoze mu bijyanye no gushora amafaranga bagura abakinnyi.
Chelsea niyo yakoresheje amafaranga menshi mu myaka ibiri ishize mu isoko ry'igura n'igurisha ry'abakinnyi.
Aba baherwe b'Abanyamerika babanje gushidikanywaho n'abafana b'iyi kipe babashinja ubuturi ku kuba batazabasha kwikora ku ikofi ngo bagure abakinnyi nk'uko Umurusiya Roman Abramovich yabigenzaga.
Izi mpungenge ariko aba baherwe berekanye ko nta shingiro zifite ubwo bashoraga Miliyoni zirenga 600 z'Amayero mu mwaka wabo wa mbere bafashe iyi kipe ifite ibikombe bibiri bya Champions League.
Aka kayabo k'amafaranga ariko ntacyo kafashije iyi kipe mu kuyiha umusaruro mwiza mu kibuga - ibintu byatumye barebera ikibazo ku batoza aho bamaze gukorana n'abagera kuri batatu mu gihe cy'imyaka 2 gusa.
Umutoza Mauricio Pochettino bamuzanye bamubonamo ubushobozi bwo kubahesha intsinzi gusa mu mikino 6 amaze gukina yatsinzemo 1 gusa anganya 2 atsindwa 3.
Mu manota 18 ya Shampiyona Chelsea imaze gukinira ifitemo 5 gusa. Ndetse bamwe mu basesengura iby'umupira w'amaguru batangiye kubona Pochettino nk'ikibazo- ibishobora gutuma nawe asezererwa rugikubita.
Twabibutsa ko ikipe Chelsea ikomeje kugaraguzwa agati muri iyi minsi atari agafu k'imvugwarimwe muri Shampiyona y'Abongereza kuko yibitseho ibikombe 5 byose.