Manchester United yamaze kubona umusimbura wa Maguire ihanganiye cyane na Liverpool

Ikipe ya Manchester United yo mu gihugu cy'Ubwongereza ishaka umusimbura wa Harry maguire iri mu rugamba rutoroshye rwo gushaka uko yakibikaho myugariro ukomeye cyane ihanganiye bitoroshye n'ikipe ya Liverpool itozwa na Jurgen Klopp.

Ku isoko ry'igura n'igurisha ry'abakinnyi ryo mu mpeshyi, habuze gato ngo Harry Maguire asohoke mu ikipe ya Manchester United y'umutoza Ten Hag nyuma yo kwamburwa igitambaro cy'ubukapiteni.

Byavugwaga ko ikipe ya West Ham United yamwifuzaga cyane ngo ajye kuyifasha mu bwugarizi bwayo.

Nyuma yo kwamburwa ubukapiteni, Maguire yagiriwe inama na bamwe mu banyabigwi b'ikipe ya Manchester United yo kuyisohokamo ariko aranga avunira ibiti mu matwi.

Harry Maguire yatangaje ko atazava muri iyi kipe ahubwo azahanganira umwanya na bagenzi be - Ibintu bikomeje kumugora cyane dore ko kugeza ubu muri iyi sezo amaze gukina iminota myinshi (45') mu ikipe y'igihugu y'Ubwongereza kurusha iyo amaze gukinira Man United (26').

Amakuru dukesha 'football insider' avuga ko Manchester United yifuza cyane umusore w'imyaka 22 w'ikipe ya Sporting CP mu gihugu cya Portugal kugira ngo aze gusimbura Harry Maguire w'imyaka 30 Man United ishaka kurekura.

Umukinnyi Manchester United yifuza ni Goncalo Inacio nyuma yo kwitwara neza muri Shampiyona ya 22/023 aho yakinnye imikino 52 atsindamo ibitego 4 atanga n'imipira itatu yavuyemo ibitego (assist).

Goncalo Inancio witezweho gusimbura Maguire muri Manchester United

Bivugwa ko uyu mukinnyi ubarirwa muri Miliyoni 52 z'Amayero ashobora kuzagurwa n'iyi kipe mu kwezi kwa mbere mu gihe hari n'andi makuru yemeza ko Liverpool na Newcastle United nazo ziri gucungira hafi uyu mukinnyi.

Mu mukino Portugal iheruka gutsindamo Luxembourg ibitego 9-0, Goncalo Inacio yatsinzemo ibitego 2.