Ibuye ryanzwe niryo ryakomeje imfuruka ! Man United ikuye amanota 3 mu menyo ya rubamba - AMAFOTO
Scott McTominay yatsinze ibitego 2 ahesha amanota 3 Manchester United
Manchester United yatsinze Brentford ibitego 2-1
Kuri uyu wa gatandatu ikipe ya Manchester United yabashije gutahana amanota 3 nyuma yo gutsinda Brentford ibitego 2-1 mu mukino wayikomereye cyane.
Byasabye ikipe ya Manchester United gutegereza iminota y'inyongera kugirango itahane amanota atatu yose nyuma y'uko iminota 90 yageze Brentford iri imbere n'igitego kimwe ku busa.
Scott McTominay niwe wabaye umucunguzi w'iyi kipe nyuma yo kwinjira mu kibuga asimbuye Umunya-Maroc Armrabat ku munota wa 86' w'umukino.
Uyu musore akigeramo yatsinze igitego ariko umusifuzi wo ku ruhande avuga ko hari habayeho kurarira. Hitabajwe VAR birangira iki gitego cyanzwe.
McTominay ntiyacitse intege kuko ku munota wa 93 yatsinze igitego cya mbere agarurira icyizere abafana ba Manchester United bari bihebye.
Uyu musore kandi wakoze ku mupira inshuro eshanu gusa ebyiri zikaba zavuyemo ibitego yongeye kunyeganyeza inshundura ku munota wa 97' w'umukino bihesha Manchester United intsinzi y'ibitego 2-1.
Scott McTominay watsinze ibitego 2 yakoze ku mupira inshuro 5 gusa.
Uyu mukinnyi yafashwe nk'intwali ya Manchester United kuri uyu mukino nyamara mu gihe yari yirengagijwe iminota 86 yose y'umukino ari nabyo byatumye bamwe bavuga ko byabaye nka ya mvugo ngo 'Ibuye ryirengagijwe cyangwa ryanzwe niryo ryakomeje imfuruka'.
