Tshisekedi yamaze gutanga Kandidatire yo kwiyamamariza kuyobora Congo muri manda ya 2
Thsisekedi unengwa bikomeye n'abatavuga rumwe n'ubutegetsi bwe aziyamamariza kuyobora Congo
Mu gihe uyu munsi ku cyumweru aricyo gihe ntarengwa ku bifuza gutanga kandidatire zabo kuri komisiyo ishinzwe amatora muri DR Congo perezida Tshisekedi yamaze gutanga kandidatire ye nk'umwe mu bazaba bahataniye intebe y'icyubahiro ya kiriya gihugu.
Perezida Félix Tshisekedi wa Repubulika ya Demokarasi ya Congo yiyandikishije ku mugaragaro nk'umukandida mu matora ya perezida y'uyu mwaka.
Tshisekedi yagejeje ku kanama k'amatora k'igihugu ibisabwa kugira ngo ashobore kwiyamamariza manda ya kabiri y'imyaka itanu.
Itegekonshinga rya DR Congo riteganya ko Perezida ashobora gutegeka gusa kuri manda ebyiri zikurikirana z'imyaka itanu kuri buri manda.
Tshisekedi, w'imyaka 60, yatowe bwa mbere mu 2018, mu matora yanenzwe henshi ko yabayemo uburiganya.
Radio Okapi y'Umuryango w'Abibumbye ikorera muri DR Congo, yasubiyemo amagambo ya Tshisekedi ubwo yaganiraga n'abanyamakuru i Kinshasa amaze gutanga kandidatire, avuga ko mu gihe yaba atowe yakomeza urugamba rwo gutuma igihugu cye kigira ubwigenge mu bukungu.
Radio Okapi yasubiyemo Tshisekedi agira ati "Urugamba rwanjye rurakomeje kandi mpamagariye abaturage kumperekeza nkarutsinda.
"Urugamba rwanjye ni urwo gutuma tugira ubwigenge mu bukungu. Uyu munsi nshobora kuvuga ko turi mu nzira nziza."
Thsisekedi yatanze kandidatire ye aherekejwe na bamwe bo mu muryango we
Atanze kandidatire ye kandi mu gihe hari hashize iminsi micye ishyaka rye rya 'Union Sacree' rimugennye nk'umukandida uzarihagararira mu matora ateganyijwe mukwa 12 uyu mwaka.
Tshisekedi ubu ahatanye n'abandi bakandida 15, barimo abakomeye, nk'uwahoze ari Minisitiri w'intebe Augustin Matata Ponyo, Martin Fayulu na muganga Denis Mukwege, mu 2018 watsindiye igihembo cy'amahoro cyitiriwe Nobel.
Abashaka kwiyamamaza mu matora ya perezida bafite igihe ntarengwa cyo kugeza kuri iki cyumweru, tariki ya 8 Ukwakira (10) ngo babe bamaze kugeza kandidatire zabo ku kanama k'amatora.
Imyaka itanu ishize y'ubutegetsi bwa Tshisekedi yashegeshwe n'umutekano mucye wakomeje kurangwa muri icyo gihugu, ibibazo by'ubukungu, n'ingorane zo mu rwego rw'ubuvuzi, nk'icyorezo cya Covid-19 n'ibiza bya Ebola.