Ku nshuro ya mbere Arteta abashije gutsinda Man City ya Gualdiola muri Shampiyona- AMAFOTO
Arsenal yatsinze Manchester City 1-0
Bwa mbere kuva mu 2015 Arsenal itsinze Manchester City muri Shampiyona
Gabriel Martineli yafashije Arsenal gutsinda Manchester City
Kuri iki cyumweru Mikel Arteta utoza ikipe ya Arsenal yabashije gutsinda ku nshuro ya mbere muri Shampiyona ikipe ya Manchester City itozwa n'umutoza Pep Gualdiola.
Kuva Arteta yatangira gutoza ikipe ya Arsenal yari atarabasha gutsinda muri Shampiyona umutoza Gualdiola yahoze yungirije mu ikipe ya Manchester City mbere y'uko agirirwa icyizere agahabwa gutoza Arsenal mu myaka ibiri ishize.
Iyi ntsinzi yakuyeho agasuzuguro gakomeye ikipe ya Manchester City yari imaze igihe yarashyize kuri Arsenal dore ko kuva mu mwaka wa 2015 Arsenal yari itarabasha gutsinda City muri Shampiyona.
Arsenal yari imaze imikino 13 yose iyitsindwa n'ikipe ya Manchester City kuva muri 2015.
Igitego cya Martinelli winjiye mu kibuga asimbuye Trossard cyakuyeho umuvumo iyi kipe yari imaranye imyaka 8 imbere ya Manchester City.
Martinelli yafashije Arsenal kwigobotora Manchester City yari yarayigize akarima kayo.
Ni ikipe ya Arsenal yatsinze ibikwiye dore ko n'ubwo itari ifite umusore Saka yabashije kurusha cyane Manchester City muri uyu mukino.
Ku rundi ruhande Man City yakinnye uyu mukino idafite Kevin De Bryne wakunze kuzonga Arsenal mu nshuro zose bahuye arimo.
Arsenal yashoboraga gukina na Manchester City ari abakinnyi 10 iyo Kovacic yerekwa ikarita itukura nyuma yo gukorera ikosa rikomeye Odegaard n'irindi yakoreye Declan Rice ariko bikirengagizwa n'umusifuzi.
Gutsinda uyu mukino byatumye ikipe ya Arsenal ihita ifata umwanya wa kabiri aho inganya amanota 20 n'ikipe ya Tottenham iri ku mwanya wa mbere. Izi kipe kandi zinganya n'umubare w'ibitego zizigamye (10).
Manchester City yo yahise ijya ku mwanya wa gatatu nyuma yo gutsindwa inshuro ebyiri zikurikiranya muri Shampiyona dore ko yari iherutse gutsindwa na Wolves.
Umwanya wa kane ufitwe na Liverpool nyuma yo kunganya na Brighton mu mukino utari woroshye wabanjirije uwa Arsenal na Manchester City.
Amwe mu mafoto y'ingenzi yaranze uyu mukino
Martinelli wari umaze igihe mu mvune niwe wabaye intwali muri uyu mukino nyuma yo gutera ishoti rikomeye rigakora ku mutwe wa Nathan Ake bikarangira ahinduriye umupira icyerekezo igitego kikaba cyinjiye gutyo.
@Philippe NDAYISENGA