Kuki Misiri Ikomeje Gufunga Inzira Yafasha Abanya-Palestine Guhunga ?

Bamwe mu bakurikirana ibijyanye n'intambara ya Israel na Hamas baribaza impamvu Abasiramu bo mu Misiri badashobora gufungurira inzira benewabo b'Abanya-Palestine ngo babashe guhunga.

Diana wo mu Bwongereza, arabaza: Abayisilamu bavuga ku kuba umuryango (umwe) n'ubuvandimwe bwo muri Islam. Ni gute Abayisilamu bo mu Misiri bashobora gusobanura gukomeza gufunga umupaka wabo na Gaza?

Jeremy Bowen, umwanditsi mukuru mpuzamahanga wacu, urimo gutara amakuru mu majyepfo ya Israel, arasubiza:

Islam ni ukwemera ariko ntabwo byanze bikunze irenga politiki y'umutekano w'igihugu.

Ndabizi ko Abayisilamu b'Abanya-Misiri babarirwa muri za miliyoni bashaka koroshya akababaro k'abasivile muri Gaza.

Ariko guverinoma ya Misiri, no mu bihe by'ituze, ntabwo yemera kugera by'akamenyero mu nzira ya Rafah ku bavuye muri Gaza. Misiri yabaye umufatanyabikorwa muto mu buryo bwa mbere yaho bwa Israel bwo kugota Gaza, kuva Hamas yafata ubutegetsi muri Gaza mu mwaka wa 2007.

Hamas ifite inkomoko muri Muslim Brotherhood, umuryango washingiwe mu Misiri mu myaka 100 ishize. Brotherhood ishaka guha iforoma nshya za leta na sosiyete mu buryo bujyanye n'inyigisho ya kisilamu n'imyemerere ya kisilamu.

Igisirikare cya Misiri nticyemera uko gushaka kwayo. Mu 2013 cyahiritse Perezida wari watowe wo muri uwo muryango.

Ubutegetsi bwa Misiri buriho muri iki gihe, bufitanye umubano na Hamas, ndetse mu gihe cyashize bwabaye umuhuza hagati ya Hamas na Israel. Ariko ntibushaka ko impunzi z'Abanya-Palestine zihaza ku bwinshi.

Inkambi zo muri Gaza ziracyariho nyuma y'imyaka 75 zishinzwe ngo zakire impunzi - zirukanwe na Israel yari imaze kubona ubwigenge - zitarigera na rimwe zemererwa gusubira iwabo.