Ni inde uzegukana intsinzi? Vestine na Dorcas bahanganye na Israel Mbonyi mu cyiciri kimwe muri IMA Awards 2023

Mu irushanwa ryo guhatanira igihembo cya Best Gospel Artist muri Isango na Muzika (IMA Awards), Vestine na Dorcas babitse bisanze mu cyiciro kimwe na Israel Mbonyi umaze kucyegukana inshuro ebyiri mu myaka itatu ibi bihembo bimaze bitangwa, mu gihe iri tsinda ryo ryacyegukanye inshuri imwe, rikaba ari na ryo riherutse kucyegukana.

Aba baririmbyi bahuriye muri iki cyiciro cy’umuhanzi witwaye neza mu bakora indirimbo zo kuramya no guhimbaza Imana (Best Gospel Artists) bahuriyemo na Josh Ishimwe ndetse na Aline Gahongayire.

Israel Mbonyi wegukanye iki cyiciro inshuro ebyiri mu 2020 na 2022 ni ubwa gatatu agiye guhatanira iki gihembo muri Isango na Muzika Awards.

Vestine na Dorcas nabo ni inshuro ya gatatu bagiye guhatanira iki gihembo (Best Gospel Artist) bacyegukanye mu 2021.

Aline Gahongayire ni inshuro ya gatatu agiye guhatanira ibi bihembo, gusa abitse igihembo kimwe yegukanye mu 2021 mu cyiciro cya Best Collaboration (indirimbo ihuriyemo abahanzi barenze umwe) agikesha indirimbo “Izindi Mbaraga” yakoranye na Niyo Bosco.

Josh Ishimwe uherutse kumurika album ye ya mbere yise “Ibisingizo bya Nyiribiremwa” ni ishuro ya mbere yinjiye mu bahanzi bahataniye ibi bihembo bya Isango na Muzika Awards.

Ibi bihembo bishimira abanyamuziki bitwaye neza buri mwaka bigiye gutangwa ku nshuro ya kane bizatangirwa mu birori bizabera muri Parkinn Hotel ku wa 17 Ukuboza 2023.

Ibi bihembo bitegurwa n’Ubuyobozi bwa Radio na Televiziyo Isango Star, uyu mwaka byagarukanye ubukangurambaga bushishikariza urubyiruko kwirida Virusi Itera SIDA.

Isango Star yamaze gutunganya urubuga rwa internet www.ima.rw ruzifashishwa mu gutora abahanzi bahize abandi.