Pep Gualdiola uzi neza Messi na Haaland yavuze ukwiye kwegukana ballon d'or ya 2023

Kuri uyu wa gatanu umutoza w'ikipe ya Manchester City, Pep Gualdiola watoje Messi mu ikipe ya FC Barcelone ubu akaba atoza Haaland muri City yatoranyijemo umwe muri aba bakinnyi ukwiye kwegukana Ballon d'Or y'uyu mwaka.

Ubwo yari ari mu kiganiro n'itangazamakuru mbere y'umukino Manchester City ifitanye na Brighton ku munsi w'ejo uyu mutoza yahishuye ko Haaland ariwe ukwiye kwegukana iki gihembo n'ubwo na Messi yamugarutseho avuga ko we adasanzwe adakwiye kugereranywa n'abandi bakinnyi.

Yagize ati "Haaland akwiye gutsindira iki gihembo nibyo, Twatwaye ibikombe bitatu (Treble) atsinda ibitego miliyoni 50.

Igikombe cya Champions League Haaland yatwaye ni kimwe mu bituma yikomanga ku gatuza nk'ukwiye kwegukana ballon d'or y'uyu mwaka.

Ku rundi ruhande ariko Haaland afite akazi katoroshye ko gutwara Messi iki gihembo dore ko ariwe wari uhetse ikipe ya Argentine yatwaye igikombe cy'Isi.

Gualdiola yakomeje agira ati "Ballon d'Or ikwiye kujya mu byiciro bibiri, Icyiciro kimwe kikaba ari Messi abandi bose bakisanga mu kindi cyiciro cya kabiri.

Umwaka w'imikino mubi wa Messi niwo mwaka mwiza w'abandi bakinnyi basigaye".

Lionel Messi yagize intangiriro nziza mu ikipe ya Inter Miami nyuma yo kuva muri PSG - Ikipe yicuza cyane impamvu yayerekejemo.

Messi watwaye igikombe cy'isi ku nshuro ya mbere ahabwa amahirwe menshi yo kwegukana ballon d'or ya 8.

Ku italiki 30 z'uku kwezi k'Ukwakira (10) nibwo hazarara hamenyekanye umukinnyi wegukana iki gihembo gikomeye gihabwa umukinnyi wahize abandi ku mugabane w'Uburayi.

Haaland amaze gutsinda ibitego 8 mu mikino 12 amaze gukina muri uyu mwaka w'imikino. Uyu mukinnyi ariko aheruka gutsinda igitego mu kwezi kwa cyenda ku italiki 23.

Ku munsi w'ejo azaba yiteguye gukuraho aka gahigo kabi anareba ko yafasha Manchester City gutsinda umukino nyuma y'imikino ibiri iheruka gukina yose iyitsindwa harimo uwa Wolves na Arsenal.

Umwanditsi : Philippe Ndayisenga