Perezida Tshisekedi akomeje gusatira intsinzi. Uko amajwi yifashe

Nyuma y’iminsi icumi habaye amatora rusange muri Repubulika ya Demokarasi ya Congo,Komisiyo ishinzwe gutegura amatora muri iki gihugu yaraye ishize hanze amajwi y’agateganyo amaze kubarurwa aho Perezida Felix Tshisekedi afite 72.89%.

Muri iyi mibare yatanzwe n’iyi komisiyo ejo ku wa gatanu, umukeba mukuru wa Perezida Tshisekedi, Moïse Katumbi, umutunzi akomeye wahoze ayobora intara ya Katanga aza ku mwanya wa kabiri n’amajwi 18.27%, naho Martin Fayulu wari wabaye uwa kabiri mu matora ya 2018 afite 5.20%.

Perezida Tshisekedi ari gushaka manda ya kabiri, ahanganye n’abandi 18 batavuga rumwe nawe, bananiwe no kwishyira hamwe kugira ngo batange umuntu umwe wari kubaserukira muri aya matora.

Muri aba bahanganye nawe, babiri muri bo bemeye ko batsinzwe, aba akaba ari Constant Mutamba, w’imyaka 35 ari na we ufite imyaka mike mu biyamamarije umwanya w’umukuru w’igihugu.

Yabyemeye ku wa kane, hamwe na Tony Bolamba wahoze ari Guverineri w’intara ya Equateur,waraye abyemeye.

Mu majwi y’agateganyo yatangajwe ejo, Perezida Tshisekedi afite amajwi miliyoni 11.6 kuri miliyoni 15.9 y’amaze kubarurwa na CENI.

Aya matora yanenzwe bikomeye n’abiyamamarije umwanya w’umukuru w’igihugu bagera ku icumi, bavuga ko yabayemo “ubujura bwinshi cyane".

Biteganyijwe ko CENI itangaza imibare y’agateganyo ya nyuma y’ibyavuye mu matora ejo ku wa 31 Ukuboza 2023.

Urukiko rushinzwe kurengera itegekonshinga rufite iminsi icumi yo kwakira ibirego by’abamagana ibizaba byatangajwe ko byavuye muri aya matora mbere y’uko urukiko rw’ikirenga rutangaza imibare ya nyuma ku wa 10 Mutarama2024. Biteganyijwe ko ibirori byo kurahira bizaba ku wa 24 Mutarama 2024.

BBC