AFCON2024: Cote d'Ivoire yazamutse ku giceri yasezereye Senegal yahabwaga amahirwe yo kwisubiza igikombe

Ikipe y'igihugu ya Cote D'Ivoire yasezereye Senegal ya Sadio Mane mu mikino ya 1/8 y'igikombe cy'Afurika cya 2023 Kiri kubera muri Cote D'Ivoire ihita yerekeza muri 1/4.

Ni umukino wabaye kuri uyu Wambere saa yine z'ijoro ubera kuri Stade Charles Konan Banny.

Ikipe y'igihugu ya Senegal yatangiye umukino iri hejuru ndetse ku munota wa 4 gusa yahise ifungura amazamu ku gitego cyari gitsinzwe na Habib Diallo ku mupira yarahawe na Sadio Mane.

Umukino wakomeje ikipe y'igihugu ya Cote D'Ivoire ikina irwana no kwishyura ndetse ikaniharira umupira ariko kugera imbere y'izamu bikagagorana.

Ku munota wa 26 Seko Fofana yabonye uburyo bwiza imbere y'izamu ku mupira yarahawe na Jean Philippe Krasso ariko agiye kurekura ishoti ba myugariro ba Senegal baramwitambika.

Igice cya mbere cyarangiye ikipe y'igihugu ya Senegal ikiyoboye n'igitego 1-0. Mu gice cya kabiri, Senegal yaje yatsa umuriro kuri Cote D'Ivoire nkaho Ismail Sarr yarekuye ishoti maze umunyezamu arataba arishyira muri koroneri.

Ikipe y'igihugu ya Cote D'Ivoire yaje gukora impinduka mu kibuga ishyiramo abakinnyi nka Frank Kessie , Sebastien Haller n'abandi ngo ishake uko yakwishyura ariko bikomeza kwanga.

Ku munota wa 84 yaje kubona penariti ku ikosa Eduard Mendy yarakoreye Nicolas Pepe amutegera mu rubuga rw'amahina iza guterwa neza na Frank Kessie ayitereka mu nshundura igitego cyo kwishyura kiba kirabonetse.

Iminota 90 isanzwe y'umukino yarangiye amakipe yombi anganya igitego 1-1 biba ngombwa ko hakinwa indi 30 y'inyongera.

Mu minota y'inyongera nabwo rwabuze gica maze hitabajwe penariti birangira ikipe y'igihugu ya Cote D'Ivoire yariri imbere y'abafana bayo yinjije 5-4 ihita yerekeza muri 1/4.

Mbere yuko uyu mukino uba saa moya, ikipe y'igihugu ya Cape Verde yari yatsinze Mauritania 1-0. Biteganyijwe ko muri 1/4 Cote D'Ivoire izakina nizava hagati ya Mali na Burkinafaso