Umushabitsi Nzizera wigeze kurebana ay'ingwe na Mulindahabi Irene ndetse n'umunyamakuru Manirakiza, yatawe muri yombi

Urwego rw’Igihugu rushinzwe Ubugenzacyaha RIB, rwafunze rwiyemezamirimo Nzizera Aimable, tariki 05 Kamena 2024, kubera ibyaha bibiri akekwaho.

Rwiyemezamirimo Nzizera Aimable usanzwe ari n’umuyobozi wa ‘Rwanda Gospel Stars Live’, akanakora mu bushabitsi butandukanye burimo ubwubatsi, yatawe muri yombi akurikiranyweho ibyaha bibiri birimo gukoresha inyandiko itavugisha ukuri no kwihesha ikintu cy’undi hakoreshejwe uburiganya.

Umuvugizi wa RIB, Dr. Murangira Thierry, yatangaje ko “Ibi byaha Nzizera Aimable akurikiranyweho bifitanye isano n’imitangire y’amasoko ya Company ‘AMAREBE INVESTIMENT Ltd’.

Ibi byaha akaba yarabikoze mu Ukwakira 2023.

Nzizera akurikiranweho ibyaha birimo guhimba, guhindura inyandiko cyangwa gukoresha inyandiko mpimbano, icyaha giteganwa n’ingingo ya 276 y’Itegeko nimero 68/2018 ryo kuwa 30 Kanama 2018 riteganya ibyaha n’ibihano muri rusange.

Uhamijwe n’Urukiko iki cyaha ahanishwa igifungo kitari munsi y’imyaka itanu ariko kitarenze imyaka irindwi n’ihazabu itari munsi ya miliyoni 3 Frw ariko atarenze miliyoni 5 Frw cyangwa kimwe gusa muri ibyo bihano.

Nzizera ariko kandi akurikiranweho icyaha cyo kwihesha ikintu cy’undi hakoreshejwe uburiganya gihanwa n’ingingo ya 174 y’itegeko nimero 68/2018 ryo ku wa 30 Kanama 2018 riteganya ibyaha n’ibihano muri rusange.

Uhamijwe n’Urukiko iki cyaha ahanishwa igifungo kitari munsi y’imyaka ibiri ariko kitarenze imyaka itatu n’ihazabu itari munsi ya miliyoni 3 Frw ariko itarenze miliyoni 5 Frw.

Dr Murangira yavuze ko bibutsa Abaturarwanda kwirinda ibyaha ibyo ari byo byose.

Ati “Ukora ibyaha wese akoresha amayeri yose akeka ko atazatahurwa aribeshya. Urwego rw’Ubugenzacyaha RIB, Abagenzacyaha bafite ubushake, ubumenyi, ubushobozi ndetse n’ubufatanye n’abaturage bwo gutahura no kugenza ibyaha ababikora bakeka ko bitazamenyeka. Inama twabagira ni iyo guca ukubiri n’icyaha naho ubundi bazafatwa bashyikirizwe Ubutabera.”

Nzizera azwi cyane mu manza zitandukanye ndetse yamenyekanye ubwo yashinjaga umunyamakuru Manirakiza Theogene ibyaha birimo ruswa bituma afungwa. Uyu kandi yigeze kurebana ay'ingwe na M. Irene bapfa ko yashakaga kumwambura abaririmbyi Vestine na Dorcas babarizwa muri MIE ya Murindahabi Irene.