Virus ya Marburg imeze nka Ebola yageze mu Rwanda

Minisiteri y’ubuzima yatangaje ko mu mavuriro atandukanye yo mu Rwanda, hagaragaye indwara y’umuriro mwinshi iterwa na Virusi ya Marburg.

Mu itangazo yanyujije ku rukuta rwayo rwa Twitter, Minisiteri y’ubuzima yavuze ko ibimenyetso by’iyo ndwara ari umuriro mwinshi, kuribwa umutwe bikabije, kuribwa mu mitsi, kuribwa mu nda no kuruka. Yongeyeho kandi ko iyi ndwara ikwirakwizwa no gukora ku maraso n’amatembabuzi y’abantu bayirwaye, ikaba idakwirakwizwa binyuze mu mwuka.

Minisiteri y’ubuzima yakomeje ivuga ko harimo gukorwa iperereza ku cyaba gitera iyi ndwara, ndetse no gushakisha uwo ari we wese waba yahuye n’urwaye iyi ndwara ngo yitabweho n’abaganga, ndetse banasaba buri wese wagaragarwaho n’ibimenyetso by’iyi ndwara, kugana ivuriro rimwegereye cyangwa se agahamagara ikigo cy’igihugu gishinzwe ubuzima RBC ku 114.

Kugeza ubu ntiharamenyekana umubare w’abarwaye iyi ndwara, minisiteri y’ubuzima ikaba isaba abantu kudakuka imitima no gukomeza imirimo yabo, ariko bakita cyane ku bijyanye n’isuku

Iri tangazo rishyizwe ahagaragara nyuma y’iminsi hacaracara amakuru avuga ko mu Rwanda hari indwara itaramenyekana ndetse hakaba n’abavuga ko hari abamaze guhitanwa na yo. Gusa mu itangazo rya minisiteri y’ubuzima ntiyavuze ko haba hari abamaze kwicwa n’iyo ndwara, cyakora yemeye ko hari abayirwaye barimo kwitabwaho n’abaganga.

Virus ya Marburg ni iki?

Ni virus ijya gusa cyane na Ebola, nk’uko ishami rya ONU rishinzwe ubuzima ku isi ribivuga.

Virus ya Marburg yatangiye kuboneka igihe abantu 31 bayanduriye nyuma y’icyumweru bagapfa mu biza byayo byakurikiranye mu 1967 muri:

Marburg na Frankfurt, mu Budagi
Belgrade muri Serbia
Iyi ndwara basanze yaraje iturutse mu nkende zinjijwe mu Budage zivuye muri Uganda.

Ariko kuva icyo gihe iyi virus yagiye ica no mu zindi nyamaswa.

Ahabonetse virus ya Marburg ikomeye:

2017 - Uganda: abantu batatu nibo bayanduye, bose barapfuye

2012 - Uganda: 15 barayanduye, bane barapfuye

2005 - Angola: 374 barayanduye, 329 barapfuye

1998-2000 - DR Congo: 154 baranduye, 128 barapfuye

1967 - Ubudage: 29 baranduye, barindwi barapfuye