Joe Biden arashinjwa kugira uruhare mu ntsinzwi y'Abademokarate bari barangajwe imbere na Kamala Harris

Nancy Pelosi wahoze ari umukuru w’umutwe w’abadepite mu nteko ishingamategeko y’Amerika, wo mu ishyaka ry’abademokarate, yavuze ko abademokarate bari kuba baritwaye neza mu matora yo ku wa kabiri iyo Perezida Joe Biden aza kuba yararetse kwiyamamaza hakiri kare cyane.

Pelosi – umwe mu banyapolitike bakomeye cyane muri Amerika – yabwiye ikinyamakuru the New York Times ko "iyo perezida aba yaravuyemo kare cyane, hashoboraga kuba harabonetse abandi bakandida biyamamaza".

Ayo magambo ye ni ko kwitana ba mwana kwa vuba aha cyane kubayeho mu bademokarate, nyuma yuko ishyaka ryabo ritsinzwe amatora ya perezida ku wa kabiri ndetse rikaba rishobora no gutakaza imitwe yombi (uw’abadepite n’uw’abasenateri) yo mu nteko ishingamategeko y’Amerika.

Byatangajwe henshi ko Pelosi ari we wayoboye igikorwa cy’abademokarate cyo guhatira Biden kureka kwiyamamaza. Biden yaje kubireka mu mpera ya Nyakanga (7) uyu mwaka, nyuma y’ibyumweru byari bishize yotswa igitutu nyuma yo kwitwara nabi mu kiganiro mpaka na Donald Trump.

Ubwo Biden yasozaga ibikorwa bye byo kwiyamamaza, yihutiye gushyigikira Visi Perezida Kamala Harris ngo abe ari we umusimbura mu kwiyamamaza. Yatsinzwe bikomeye na Perezida watowe Trump mu matora yo ku wa kabiri.

Pelosi yabwiye ikinyamakuru the New York Times ati: "Icyari cyitezwe cyari uko, iyo perezida ajya ku ruhande, byari gutuma habaho amatora y’ibanze afunguye [yagutse]."

Amatora y’ibanze yagutse yari kwitabirwa n’abakandida benshi b’abademokarate, bagahatanira kwemezwa n’abarwanashyaka b’iryo shyaka kugira ngo havemo umwe muri bo wo gusimbura Biden akiyamamaza nk’umukandida perezida w’iryo shyaka.
Pelosi yavuze ko Harris yari kuba yaritwaye neza muri ayo matora y’ibanze kandi ko ibyo byari gutuma "agira imbaraga cyane mu cyiciro gikurikiyeho".

Pelosi, ku wa kabiri wongeye gutorerwa kuba umwe mu bagize inteko ishingamategeko umutwe w’abadepite ku nshuro ya 20 uhagarariye leta ya California, yagize ati:

"Ariko ibyo ntitubizi. Ibyo ntibyabaye. Turimo kubana [kwirengera] n’ibyabaye."

"Ndetse kubera ko perezida yashyigikiye Kamala Harris ako kanya, ibyo rwose byatumye bidashoboka ko icyo gihe tuba tugikoze amatora y’ibanze. Iyo biza kuba byarabaye hakiri kare cyane, [ibintu] byari kuba byaragenze ukundi."

Baganira n’igitangazamakuru Politico cy’inkuru za politike, abajyanama ba Harris na bo gutsindwa kwe bakwegetse kuri Biden, bavuga ko Biden yagakwiye kuba yararetse kwiyamamaza hakiri kare cyane.

Umujyanama umwe utatangajwe izina yagize ati: "Twakoze ibikorwa byo kwiyamamaza byiza cyane uko twari tubishoboye, tuzirikana ko Joe Biden yari perezida.

"Joe Biden ni we mpamvu imwe rukumbi yatumye Kamala Harris n’abademokarate batsindwa iri joro [ryo ku wa kabiri]."

Ariko uwahoze ari umujyanama wa Biden yabwiye igitangazamakuru Axios, na cyo cy’inkuru za politike, ko Harris arimo gushaka inzitwazo (urwitwazo).

Uwo wahoze ari umujyanama yagize ati: "Ni gute wakoresheje miliyari 1 y’amadolari y’Amerika ntutsinde?" Yongeyeho n’imvugo y’urukozasoni.

Muri iki cyumweru, uwahoze ari umujyanama wa Biden utatangajwe izina yabwiye igitangazamakuru Politico ko abajyanama b’uwahoze ari Perezida w’Amerika Barack Obama ari bo bo kwegekwaho gutsindwa kwa Harris kuko "bashishikarije mu ruhame gusubiranamo kw’abademokarate [kugamije] kwo gusunikira hanze Joe Biden, ntibanashakaga ko Kamala Harris aba umukandida".

Senateri John Fetterman wa leta ya Pennsylvania, w’umudemokarate, yegetse gutsindwa mu matora kw’ishyaka ryabo ku bantu bacuze umugambi wo gukuraho Biden.

Mu kiganiro yagiranye n’igitangazamakuru Semafor cy’inkuru za politike, Fetterman yagize ati: "Ku bafashe icyemezo ndetse bagasenya Biden, nuko mukabona amatora mwashakaga, birakwiye kwirengera ibyayavuyemo n’ingaruka."

Tom Suozzi, Depite w’umudemokarate uri mu bahagarariye leta ya New York mu nteko ishingamategeko, yavuze ko ku ruhande rumwe ishyaka ryabo ryatsinzwe amatora kubera kwibanda ku "mvugo yemewe ya politike [yo kwigengesera]".

Yavuze ko ishyaka ry’abademokarate ryagowe no gusubiza ku mirongo migari y’ibitero by’ishyaka ry’abarepubulikani ijyanye n’"akajari muri za kaminuza, kureka guha inkunga polisi, abavutse ari abahungu [bakaba] bakina mu mikino y’abakobwa, n’igitero rusange ku ndangagaciro gakondo".

Ritchie Torres, undi Depite w’umudemokarate uhagarariye leta ya New York, yatangaje ubutumwa ku rubuga nkoranyambaga X, yegeka gutsindwa kw’ishyaka ryabo ku "bahezanguni mu guharanira impinduka".

Yavuze ko abo bahezanguni bo mu ishyaka ry’abademokarate "bashoboye kuritandukanya na benshi basanzwe baritora b’aba Latino, abirabura, Abanyaziya, n’Abayahudi bo mu ishyaka ry’abademokarate, [abahezanguni] bakoresheje amagambo y’ubupfapfa nko ’kureka guha inkunga polisi’..."

Senateri wigenga Bernie Sanders, wiyamamaje ku mwanya wa perezida nk’umudemokarate mu matora yo mu mwaka wa 2016 no mu 2020, abinyujije mu itangazo rirerire yasohoye yashinje iryo shyaka gutererana abantu bakora imirimo ya nyakabyizi.

Yanditse ati: "Mu gihe ubuyobozi bw’abademokarate bushyigikiye uko ibintu bimeze ubu, Abanyamerika bararakaye ndetse barashaka impinduka."

"Kandi bafite ukuri."

Yavuze ko bishoboka ko abademokarate nta somo bazigira mu byavuye mu matora.

Ariko Jaime Harrison, umukuru wa komite yo ku rwego rw’igihugu y’ishyaka ry’abademokarate, yasubije ku rubuga X kuri ibyo Sanders yarishinje, avuga ko "nta shingiro na busa" bifite.