Pep Guardiola yatakaje icyizere cyo gutwara Premier League uyu mwaka

Umutoza wa Manchester City, Pep Guardiola, yatangaje ko nyuma y’uko abona ibihe arimo bitameze neza, yumva aricyo gihe ngo byibuze indi kipe ibe yabona amahirwe yo kwegukana Igikombe cya Shampiyona mu Bwongereza.

Ibi ni bimwe mu byo uyu mugabo yatangaje ubwo yari amaze gutsindwa na Brighton & Hove Albion F.C ibitego 2-1, agahita arushwa amanota atanu na Liverpool kugeza ubu iyoboye urutonde rw’agateganyo.

Uyu mugabo utakaje imikino ine yikurikiranya bwa mbere mu mateka ye, yavuze ko hari impinduka zigomba kubaho ariko hari indi kipe ifite gahunda yanyuzamo ikamwambura igikombe.

Ati “Tugomba kugerageza tukongera gutsinda imikino. Gutsindwa kane twikurikiranya, hari ibigomba guhinduka kandi vuba. Uko imikino ipanze birakomeye ariko abakinnyi nibagaruka hari ikizakorwa.”

“Ariko wenda biranashoboka ko nyuma y’imyaka irindwi dutwayemo ibikombe bitandatu bya Premier League, ari undi mwaka w’amahirwe ku yindi kipe ngo na yo igitware ibikwiriye.”

Guardiola amaze gutakaza imikino ine yikurikiranya mu marushanwa atandukanye, ndetse mu myaka 18 ishize akaba ari bwo bwa mbere Man City iheruka gutsindwa izo nshuro.

Muri iyo mikino harimo uwa Bournemouth na Brighton muri Shampiyona, Tottenham muri Carabao Cup ndetse na Sporting muri UEFA Champions League.

Gutsindwa ni mu gihe kuko iyi kipe ifite abakinnyi bakomeye bagize imvune barimo Rodri uheruka gutwara Ballon d’Or, Oscar Bobb, Ruben Dias, John Stones, Jack Grealish na Jeremy Doku.