Uganda: Kizza Besigye utavuga rumwe n'ubutegetsi yaburiwe irengero

Col. Dr Kizza Besigye utavuga rumwe n’ubutegetsi bwa Perezida Yoweri Kaguta Museveni wa Uganda, amaze iminsi yaraburiwe irengero.

Amakuru avuga ko uyu mugabo yaburiye i Nairobi muri Kenya aho yari yagiye ku wa Gatandatu w’icyumweru gishize, aho yari yitabiriye igikorwa cyo kumurika igitabo.

Hagati aho umugore w’uyu mugabo wahoze ari umusirikare akanaba umuganga bwite wa Perezida Yoweri Kaguta Museveni, yashinje Leta y’iki gihugu kuba yamushimuse mbere yo kujya kumufungira muri imwe muri gereza za gisirikare zo muri Uganda.

Winnie Byanyima abinyujije ku rubuga rwe rwa X yagize ati: "Ndasaba Guverinoma ya Uganda guhita irekura umugabo wanjye, Dr Kizza Besigye aho imufitiye hose".

Yakomeje agira ati: "Yashimutiwe i Nairobi ku wa Gatandatu w’icyumweru gishize aho yari yitabiriye igikorwa cyo kumurika igitabo cya Martha Karua. Kuri ubu mfite amakuru yizewe y’uko ari muri gereza ya gisirikare i Kampala."

Kugeza ubu ntacyo Leta ya Uganda iratangaza ku bivugwa n’umuryango wa Colonel Besigye, ndetse n’impamvu yaba yatawe muri yombi ntiramenyekana.

Hagati aho umugore we avuga ko nta n’impamvu yatuma afungirwa muri gereza ya gisirikare kuko atakiri umusirikare; agasaba ko nk’umuryango we ndetse n’abamwunganira mu mategeko bakwemererwa kumubona.

Col. Dr Kizza Besigye ni umwe mu bafite ijambo rikomeye muri Politiki ya Uganda, ndetse yahatanye mu matora na Perezida Yoweri Kaguta Museveni ariko birangira atabonye amahirwe yo kumushyigura ku butegetsi.

Urugendo rwa Besigye nk’umunyapolitiki kandi rwakunze kurangwa no gufungwa bya hato na hato ariko akagenda arekurwa.