Ibitaravuzwe ku ikorwa ry'indirimbo ya Bwiza na The Ben 'Best friend'

Bwiza yamaze gushyira hanze amashusho y’indirimbo ye nshya yise ‘Best friend’ aho yayifatanyije na The Ben, gusa umushinga wo kuyikora ntabwo wari woroshye kuko byinshi mu byari byateguwe mu ifatwa ry’amashusho yayo byaje guhinduka ku munota wa nyuma.

Nk’ubu amakuru IGIHE ifite ahamya ko John Elarts wayifatiye amashusho yiyambajwe by’ikubagahu, dore ko atari we wari wateguwe mu ikorwa ry’amashusho yayo kuko KIKAC Music yifuzaga ko yakorwa na Fayzo Pro ndetse ibiganiro byaratangiye ku mpande zombi.

Mu gihe haburaga iminsi mike ngo umushinga wo gufata amashusho y’iyi ndirimbo utangire gushyirwa mu bikorwa, Fayzo Pro yaje kwivanamo mu buryo butunguranye.

Ubuyobozi bwa KIKAC Music butari bufite igihe kinini cyo gushaka andi mahitamo, nyuma yo kuganira na The Ben, bemeranyije gukorana na John Elarts ahita akatirwa itike y’indege shishi itabona aza mu Rwanda, dore ko akomoka mu Burundi.

John Elarts wagombaga kugera i Kigali bugacya akora akazi, yasabye ko nibura yahabwa undi munsi bakabona gufata amashusho y’iyi ndirimbo, aho yabanje gusura aho bazafatira amashusho.