Ukraine: Perezida Zelensky yakuriye inzira ku murima abari bategereje amatora ya Perezida
Perezida wa Ukraine, Volodymyr Zelensky, yatangaje ko igihugu cye kigomba kubanza kubona amahoro, mbere y’uko haba amatora y’Umukuru w’Igihugu.
Ibi Perezida Zelensky yabitangaje nyuma y’uko akomeje gushinjwa kuyobora igihugu binyuranyije n’amategeko kuko manda ye yarangiye muri Werurwe 2024, ariko aza gusubika amatora kuko igihugu cye kiri mu ntambara.
Ubwo yari imbere y’Inteko Ishinga Amategeko ku wa Kabiri tariki 19 Ugushyingo 2024, Zelensky yavuze ko Ukraine idashobora gukora amatora iri mu ntambara.
Ati “Twese turabizi ko Itegeko Nshinga rya Ukraine n’amategeko yayo bitemera gukora amatora mu ntambara, kandi ku Isi nta muntu wigeze asaba ibi Ukraine, ariko wenda hari abantu bashobora kuba banyotewe n’amatora muri Ukraine, ku buryo bashaka kuryana aho kurwanira igihugu cyacu.”
Yakomeje avuga ko “mbere na mbere Ukraine ikeneye amahoro kugira ngo Abanya-Ukraine bakore amatora anyuze mu mucyo. Tugomba gushyira imbere inyungu duhuriyeho, aho kuhashyira ibyifuzo by’abantu ku giti cyabo.”
Perezida Volodymyr Zelensky yatorewe kuyobora Ukraine muri Gicurasi 2019.