Abanyarwanda bajya muri Liberia bakuriweho Visa

Umuyobozi w’Urwego rushinzwe Abinjira n’Abasohoka muri Liberia, Elijah F. Rufus, yatangaje ko Abanyarwanda bemerewe kwinjira muri Liberia nta visa batswe.

Ni mu itangazo ryashyizweho umukono ku wa 11 Ugushyingo ryandikirwa abakozi bose b’urwo rwego rushinzwe abinjira n’abasohoka muri Liberia LIS.

Urwego rw’Igihugu rushinzwe Abinjira n’Abasohoka mu Rwanda na rwo rwatangaje ko Liberia yamaze kugera ku ntambwe yo gukuriraho Visa Abanyarwanda nk’imwe mu nzira yo gukomeza umubano mu bya dipolomasi n’umubano hagati y’ibihugu byombi.

Rwanda travel guide

Leta y’u Rwanda n’iya Liberia zashyize umukono ku masezerano y’ubufatanye arimo ayemerera abaturage b’ibihugu byombi kugenderana nta Visa basabwe, ku wa 10 Nzeri 2025.

Ni amasezerano yashyiriweho umukomo i Monrovia mu Murwa Mukuru wa Liberia.

Muri uwo muhango, u Rwanda rwari ruhagarariwe na Minisitiri w’Ububanyi n’Amahanga n’Ubutwererane, Nduhungirehe Olivier, wari muri ruzinduko rugamije gutsura umubano n’icyo gihugu mu gihe Liberia yari ihagarariwe na Minisitiri w’Ububanyi n’Amahanga wayo, Sara Beysolow Nyanti.

Amasezerano yasinywe ari mu byiciro bibiri birimo ayo gukuriranaho Visa ku baturage b’ibihugu byombi no gushyiraho komite ihuriweho n’impande zombi ishinzwe gukurikirana ubufatanye bw’u Rwanda na Liberia.

U Rwanda na Liberia bisanganywe umubano mwiza haba mu bijyanye na politiki cyane cyane mu bufatanye hagati y’Inteko zishinga Amategeko z’ibihugu byombi, uburezi aho amashuri makuru na za Kaminuza mu Rwanda usangamo abanyeshuri baturutse muri Liberia n’ibindi.

Ni ibihugu kandi bijya guhuza amateka kuko Liberia yazahajwe n’intambara mu myaka ya 1990 ikangiza byinshi, mu gihe u Rwanda rwashegeshwe na Jenoside yakorewe Abatutsi yahitanye abasaga miliyoni.

Ibyo wamenya kuri Liberia

Liberia ni igihugu cyo mu Burengerazuba bwa Afurika gifite amateka yihariye, umuco utandukanye n’uw’ibindi bihugu n’amahirwe menshi.

Ni kimwe mu bihugu bya Afurika byabonye ubwigenge hakiri kare cyane, mu mwaka wa 1847.

Iki gihugu gifite ubuso bwa 111.369 km², gituwe n’abaturage bangana na miliyoni 5,7 kikaba kiyobowe na Perezida Joseph Boakai.

Yashinzwe n’abirabura bahoze ari abacakara muri Leta Zunze Ubumwe za Amerika, bituma igihugu kiba n’amateka akomeye ahuza umugabane wa Afurika n’uw’Amerika. Byatumye ishingiro ry’umuco, politiki n’imiterere yacyo biba ibidasanzwe muri Afurika.

Liberia kandi ikoresha Icyongereza nk’ururimi ruhuza abaturage bayo n’ubwo hari izindi ndimi gakondo 20 zivugwa mu bice bitandukanye by’igihugu.

Iki gihugu kandi gifite umutungo kamere mwinshi harimo amashyamba, amabuye y’agaciro, zahabu, amavuta yo guteka, ubutaka bwera n’ibindi. Ubukungu bwacyo nko mu 2024 bwazamukaga ku kigero cya 4%. Ni igihugu gikoresha amadorali yacyo aho 1000 cy’amadorali ya Liberia kingana na 7.900-8.000 Frw.

Umujyi wa Monrovia ufite icyambu gikomeye gishobora gufasha ibihugu byinshi bya Afurika mu bucuruzi mpuzamahanga cyane ko gikora ku nyanja y’Abahinde n’iya Atlantic.

Icyemezo Liberia yafashe cyo gukuraho viza ku Banyarwanda cyatangaje benshi, kikaba kimaze gushyira imbere inzira nshya y’ingendo n’ubucuruzi hagati y’ibihugu.

Uhereye ku mpera za 2025, Abanyarwanda bemerewe kwinjira muri Liberia nta viza basabye, bahabwa gusa entry stamp ku mipaka cyangwa ku kibuga cy’indege.

Iki gikorwa kigamije koroshya ubuhahirane, guhuriza hamwe abaturage, guteza imbere ubukerarugendo n’ubucuruzi, ndetse no gukomeza kwagura isoko rya Afurika nk’uko ibihugu byinshi bikomeje kubikora.

Abashoramari n’abacuruzi b’Abanyarwanda bashobora kubona amahirwe menshi muri Liberia, cyane cyane mu mwihariko w’ibikorwa by’ubucuruzi, ibyambu, ubuhinzi bugezweho n’inganda.

Abanyeshuri n’abaharanira kwagura ubumenyi nabo bashobora kungukira mu mahirwe mashya yo kwiga cyangwa gukora ubushakashatsi ahantu hatandukanye muri Liberia.

U Rwanda rushobora kungukira mu kubaka ubucuti bushya n’igihugu gifite inzira nshya z’iterambere mu karere ka Afurika y’Uburengerazuba, ndetse rugashyiraho amaboko mu mishinga minini y’igihe kirekire.