ikipe y'abakinnyi 23 ni yo izahagararira u Rwanda mu shampiyona Nyafurika 2025 izabera muri Kenya

Umutoza w’Ikipe y’Igihugu y’Amagare (Team Rwanda), David Louvet, yatoranyije abakinnyi 23 bazahagararira u Rwanda muri Shampiyona Nyafurika izabera muri Kenya tariki 19-23 Ugushyingo 2025.

Aba bakinnyi bamaze hafi ibyumweru bitatu mu mwiherero, biganjemo abakinnye Shampiyona y’Isi y’Amagare iheruka kubera i Kigali.

Mu bakinnyi umunani b’abagabo [Men Elite] bari mu mwiherero, barindwi ni bo bazitabira iri rushanwa rizabera i Mombasa.

Abo ni Mugisha Moïse (Benediction Club), Masengesho Vainqueur (Benediction Club), Nsengiyumva Shemu (Java-InovoTec), Manizabayo Eric (Java-InovoTec), Muhoza Eric (Team Amani), Byukusenge Patrick (Java-InovoTec) na Ngendahayo Jérémie (May Stars). Uwasigaye ni Nkundabera Eric wa Les Amis Sportifs.

Mu bagabo batarengeje imyaka 23, hatoranyijwe abakinnyi babiri muri bane, ari bo Niyonkuru Samuel (Team Amani) na Tuyizere Étienne (Java-InovoTec) mu gihe Ruhumuriza Aimé (May Stars) na Ufitimana Shadrack (Les Amis Sportifs) basigaye.

Ni mu gihe mu ngimbi hazitabira abakinnyi bose bahamagawe ari bo Ntirenganya Moïse (Les Amis Sportifs), Nkurikiyinka Jackson (Nyabihu Cycling Club), Byusa Pacifique (Les Amis Sportifs) na Ishimwe Brian (Ndabaga Cycling Team).

Mu bagore [Women Elite], abakinnyi babiri bazakina Shampiyona Nyafurika ni Nirere Xaverine (Team Amani) na Ingabire Diane (Canyon/SRAM Sondacrypto Generation) mu gihe abasigaye ari Nzayisenga Valentine (Benediction Club) na Irakoze Neza Violette wa Ridley Racing Team.

Abakobwa batarengeje imyaka 23 bazajya muri Kenya ni batatu aribo Mwamikazi Jazilla (Ndabaga Cycling Team), Ntakirutimana Martha (Ndabaga Cycling Team) na Nyirarukundo Claudette (Team Amani), aho uwasigaye ari Iragena Charlotte (Ndabaga Cycling Team).

Ni mu gihe bangavu batarengeje imyaka 19, hazakina Masengesho Yvonne wa Ndabaga Cycling Team gusa, naho Uwiringiyimana Liliane wa Friends of Nature Cycling Team yasigaye.

Ku nshuro ya mbere, u Rwanda ruzahagararirwa kandi n’abakinnyi batarengeje imyaka 17 aho abahungu bazitabira ari Shema Emmanuel na Gisubizo Issa bakinira Les Amis Sportifs mu gihe abakobwa ari Iransetsa Amina wa LWD Cycling Team na Akimana Donatha wa Ngarama Women Cycling Team.

Team Rwanda izahuguruka i Kigali ku wa Kabiri, tariki ya 18 Ugushyingo 2025, yerekeza i Mombasa aho amarushanwa azakinwa kuva tariki ya 20 kugeza ku ya 23 Ugushyingo.

Mu 2024, ubwo iri rushanwa ryari ryabereye mu Mujyi wa Eldoret muri Kenya, u Rwanda rwari rwahagarariwe n’abakinnyi 20 barimo abagabo umunani, bane batarengeje imyaka 23 na bane batarengeje imyaka 19.

Hari kandi n’abakobwa bane bakinnye mu cyiciro cy’abakuru n’abatarengeje imyaka 23.

Mu bihugu 22 byitabiriye, Team Rwanda yasoreje ku mwanya wa kane mu midali, inyuma ya Eritrea, Afurika y’Epfo na Uganda. Yegukanye imidali ine irimo umwe wa Zahabu, umwe wa Feza n’ibiri y’Umuringa.