Tanzania: Umukobwa n'umukwe ba Samia Suluhu bagizwe abaministiri

Perezida wa Tanzania, Samia Suluhu Hassan, yagize umukobwa we, Wanu Hafidh Ameir, Minisitiri wungirije w’Uburezi, mu gihe umukwe we, Mohamed Mchengerwa, yagizwe Minisitiri w’Ubuzima.

Wanu Hafidh Ameir n’umugabo we Mohamed Mchengerwa bashyizwe muri Guverinoma nshya ya Suluhu nyuma y’iminsi mike arahiriye gukomeza kuyobora icyo gihugu mu matora yakurikiwe n’imvururu z’abatamushyigikiye.

Hafidh Ameir w’imyaka 43 asanzwe ari mu Nteko Ishinga Amategeko ahagarariye agace ka Makunduchi. Yagiye kuri uwo mwanya mu matora yo ku wa 29 Ukwakira 2025, atanzwe n’ishyaka rya CCM, ari na ryo nyina Suluhu abarizwamo.

Mu bandi bahawe inshingano muri Guverinoma nshya ya Samia, harimo umuhungu wa Jakaya Kikwete, Ridhwani Kikwete, na we yagizwe Minisitiri mu Biro bya Perezida Hassan, aho azaba ashinzwe kugenzura ibikorwa rusange n’imiyoborere myiza.

Ridhwani Kikwete w’imyaka 46, asanzwe ari mu Nteko ku itike ya CCM, ahagarariye agace ka Chalinze.

Muri rusange muri Guverinoma nshya ya Samia Suluhu, igizwe n’abaminisitiri 27 n’abaminisitiri bungirije 29.

Abayobozi bakuru barindwi bari muri Guverinoma muri manda ishize ntibagarutse muri Guverinoma nshya. Barimo uwari Minisitiri w’Ingufu, Doto Biteko, Hussein Bashe wari Minisitiri w’Ubuhinzi na Seleman Jafo wari Minsiitiri w’Inganda.

Muri Guverinoma nshya, Khamis Musa Omar azaba ayoboye Minisiteri y’Imari, Mahmoud Thabit Kombo, yagizwe Minisitiri w’Ububanyi n’Amahanga, Prof. Riziki Shemdoe yagizwe Minisitiri w’Uburezi, aho azaba yungirijwe n’umukobwa wa Suluhu.

Daniel Chongolo yagizwe Minisitiri w’Ubuhinzi, mu gihe Judith Kapinga azaba Minisitiri w’Ubucuruzi n’Inganda.